Jyl basynan beri elimizde 11 adam quldyqqa satylǵan
ASTANA. KAZINFORM – Jyl basynan beri elimizdiń 9 óńirinde adamdy quldyqqa satý faktileri tirkelgen. Bul týraly Іshki ister mınıstrliginiń Kazinform saýalyna joldaǵan jaýabynda aıtylǵan.
«Jyl basynan beri eńbekke paıdalaný maqsatymen adamdy bas bostandyǵynan zańsyz aıyrýdyń 11 faktisi tirkeldi. Naqty aıtsaq, Almaty qalasynyń, Abaı, Almaty, Aqtóbe, Aqmola, Pavlodar, Mańǵystaý, Qaraǵandy jáne Soltústik Qazaqstan oblystarynyń Polıtsııa departamentterinde tirkelgen», - dep jazylǵan jaýapta.
Mınıstrlik málimetinde keıingi eki jylda qazaqstandyqtardyń shetelge quldyqqa satylý faktisi tirkelmegeni aıtylǵan. Degenmen ondaı talpynystar áli toqtamaı tur.
«Polıtsııa organdary Qazaqstan azamattaryn Ońtústik-Shyǵys Azııa, Ońtústik Koreıa, Bahreın, Túrkııa elderine shyǵaryp áketý áreketteriniń jolyn kesip turady. Al Qazaqstan aýmaǵynda qazaqstandyqtar da, Ortalyq Azııa elderiniń azamattary da quldyqqa túsip jatady», - dep jazylǵan mınıstrlik jaýabynda.
