Jyl basynan beri elden janar-jaǵarmaıdy zańsyz áketýdiń 900-ge jýyq faktisine jol berilmedi
ASTANA. KAZINFORM – QR Premer-Mınıstriniń birinshi orynbasary Roman Sklıardyń tóraǵalyǵymen ótken keńeste Qazaqstannyń ishki naryǵyn janar-jaǵarmaımen qamtamasyz etý máseleleri qaraldy. Oǵan Energetıka mınıstrligi, Qarjylyq monıtorıng agenttigi, UQK Shekara qyzmeti, Memlekettik kirister komıteti jáne «QazMunaıGaz» UK» AQ basshylyǵy qatysty.
Energetıka mınıstri Almasadam Sátqalıev pen «QazMunaıGaz» AQ basqarma tóraǵasy Maǵzum Mırzaǵalıevtyń aıtýynsha, naryqtaǵy jaǵdaı turaqty jáne janar-jaǵarmaıdyń barlyq túri boıynsha qor jetkilikti. Kóktemgi egis jumystary úshin aýyl sharýashylyǵy taýaryn óndirýshilerge dızeldik otyn jetkizý birinshi kezekte júrgizilip jatqany atap ótildi.
UQK Shekara qyzmeti dırektorynyń orynbasary Baýyrjan Ábsamatov munaı ónimderiniń kóleńkeli aǵyny men «sur» eksportyn boldyrmaý boıynsha belsendi jumys júrgizilip jatqanyn habarlady. Atap aıtqanda, Memlekettik kirister komıtetimen birlese otyryp, jyl basynan beri baqylaý-ótkizý beketterinde shamamen 130 myń lıtr kóleminde janar-jaǵarmaıdy zańsyz áketýdiń 900-ge jýyq deregi anyqtalyp, joly kesildi.
Budan bólek, jyl basynan beri Qarjylyq monıtorıng agenttiginde jalpy quny 1,6 mlrd teńge bolatyn 6 myń tonna janar-jaǵarmaıdyń zańsyz satylýy boıynsha 13 materıal tirkeldi.
Sondaı-aq keńeste reseılik tarappen qajet bolǵan jaǵdaıda janar-jaǵarmaı jetkizý týraly Úkimet deńgeıindegi kelisim bar ekeni atap ótildi.
Keńes qorytyndysy boıynsha Premer-Mınıstrdiń birinshi orynbasary ishki naryqta janar-jaǵarmaı tapshylyǵyn boldyrmaý jáne ony elden zańsyz shyǵarý áreketteriniń jolyn kesý boıynsha naqty tapsyrmalar berdi.