Jyl basynan beri elden munaı ónimderin zańsyz áketýdiń 600-ge jýyq áreketi toqtatylǵan
ASTANA. KAZINFORM — Premer-mınıstr Oljas Bektenov janar-jaǵarmaı materıaldarynyń ishki naryǵyndaǵy jaǵdaıdy baqylaýdy qamtamasyz etý jáne Qazaqstannan munaı ónimderiniń zańsyz aǵynyn boldyrmaý jónindegi tapsyrmalardyń oryndalýy týraly esepti tyńdady. Bul týraly Úkimet málim etti.
Energetıka mınıstri Erlan Aqkenjenov JJM naryǵyndaǵy turaqty jaǵdaı týraly baıandady. Qazaqstandyq munaı óńdeý zaýyttary josparly rejımde jumys istep jatqany atap ótildi.
Qazaqstandaǵy benzınniń, dızel otynynyń, avıaotynnyń jıyntyq qorlary ishki naryqtyń qajettilikterin qamtamasyz etedi. Energetıka mınıstrligi JJM óndirý jáne jetkizý jaǵdaıyn baqylaýda ustaıdy.
Іshki ister mınıstri Erjan Sádenovtiń málimetinshe, jyl basynan beri avtomobıl ótkizý pýnktterinde jalpy kólemi 40 myń lıtrden asatyn 593 munaı ónimderin áketý áreketi toqtatylǵan. Jalpy, Munaı ónimderin zańsyz áketýge jol bermeý jónindegi jol kartasy sheńberinde shekara mańy aımaqtarynda kúsheıtilgen baqylaý júzege asyrylýda. Tereńdetilgen tekserý is-sharalaryn jedel júrgizý úshin qyzmetkerler shtaty ulǵaıtyldy.
Qarjy vıtse-mınıstri Erjan Birjanov mobıldi toptardyń jumysy týraly baıandady. Patrýldeý táýlik boıy júzege asyrylady, táýekelderdi basqarý júıesi sheńberinde Shekara mańyndaǵy trassalarda avtotsısternalar men benzın tasyǵyshtar tekseriledi. Sońǵy eki táýlikte ótkizý pýnktterinde qosymsha baktar men kanıstrlerde 3 tonnadan astam JJM áketýdiń 61 áreketi toqtatyldy. Sonymen qatar, janar-jaǵarmaı materıaldaryn (JJM) tasymaldaýǵa arnalǵan 18 mamandandyrylǵan avtokólik quraly tekserildi. Onyń ishinde 34 tonna munaı ónimin tasymaldaǵan bir avtokólik quralynan saraptama júrgizý úshin synamalar men úlgiler alyndy. Qazirgi ýaqytta memlekettik kirister organdary qyzmet kórsetý kóleminiń qalyptan tys ósýi tirkelgen 62 janarmaı quıý stansasy men 22 shaǵyn munaı óńdeý zaýytynyń qyzmetine taldaý júrgizýde. Atalǵan sýbektilerge qatysty tıisti tekserý is-sharalary júrgiziletin bolady.
Sondaı-aq UQK tóraǵasynyń orynbasary — Shekara qyzmetiniń dırektory Erlan Aldajumanov, básekelestikti qorǵaý jáne damytý agenttigi tóraǵasynyń birinshi orynbasary Rýstam Ahmetov, Qarjy monıtorıngi agenttigi tóraǵasynyń orynbasary Qaırat Bıjanov baıandama jasady.
Jıyn qorytyndysy boıynsha Premer-mınıstr Oljas Bektenov munaı ónimderiniń ishki naryǵynyń turaqtylyǵyn qamtamasyz etý Úkimettiń basym mindeti bolyp sanalatynyn atap ótti. Memlekettik organdarǵa jaǵdaıdy kúndelikti baqylaýda ustaý tapsyryldy.
Aıta keteıik, buǵan deıin Oljas Bektenov aǵymdaǵy gıdrologııalyq jaǵdaı boıynsha jıyn ótkizdi.
