Jyl basynan beri bazalyq zeınetaqy mólsheri qanshalyqty ósti
ASTANA. KAZINFORM - Memleket basshysynyń tapsyrmasy boıynsha 2025 jylǵy 1 qańtardan bastap bazalyq zeınetaqynyń eń tómengi mólsheri eń tómengi kúnkóris deńgeıiniń 70%-yna deıin, al eń joǵary mólsheri 110%-ǵa deıin artty.
Bul týraly jyldy qorytyndylaǵan QR Eńbek jáne áleýmettik qorǵaý mınıstri Svetlana Jaqypovanyń quttyqtaýynda aıtylǵan.
-Qurmetti qazaqstandyqtar! Ótip bara jatqan 2025 jyl Memleket basshysy men Úkimettiń azamattardyń ómir súrý sapasyn arttyrýǵa jáne áleýmettik qoldaýdyń ataýlylyǵyn qamtamasyz etýge baǵyttalǵan tapsyrmalary men mindetterin iske asyrý turǵysynan bizdiń Mınıstrlik úshin óte jaýapty jyl boldy. Eń aldymen, ótip bara jatqan jyly memlekettiń barlyq áleýmettik mindettemeleri ýaqtyly jáne tolyq kólemde oryndalǵanyn atap ótkim keledi,-dedi mınıstr quttyqtaýynda.
Mınıstrlik málimetterine qaraǵanda, búgingi tańda respýblıkalyq bıýdjet qarajaty esebinen mólsheri jyl saıyn ındeksteletin bazalyq jáne yntymaqty zeınetaqylardy qosa alǵanda, áleýmettik tólemderdiń 41 túri júzege asyrylyp keledi. Jyl basynan beri zeınetaqylar men járdemaqylardy tóleýge 4,6 mln-nan astam adam úshin shamamen 5,9 trln teńge baǵyttaldy, onyń ishinde 2,5 mln-ǵa jýyq zeınetker men 2,1 mln-nan astam memlekettik járdemaqy alýshy bar.
Jumys berýshilerdiń mindetti zeınetaqy jarnalarynyń mólsherlemesi kezeń-kezeńimen ulǵaıyp keledi, ol 2028 jylǵa qaraı 5%-ǵa jetedi. Búginde jınaqtaýshy zeınetaqy júıesine jumyspen qamtylǵan halyqtyń 65%-y qatysady.
Osyǵan deıin Qazaqstanda zeınetaqy jınaqtaryn muragerlerge tóleý tártibi ózgeretini týraly jazdyq.