Jyl basynan beri Bas prokýrordyń aralasýymen 4 adam aqtaldy

ASTANA. KAZINFORM — Qostanaı oblysy Altynsarın aýdandyq sotynyń apellıatsııalyq sot alqasy ózgerissiz qaldyrǵan úkimmen Kenjeǵarın QK 190-babynyń 1-bóligi boıynsha alaıaqtyq jasaǵany úshin bir jylǵa bas bostandyǵy shekteldi.

Atap aıtqanda, Kenjeǵarın Qostanaı oblysy Altynsarın aýdanynyń zańdastyrý komıssııasyna qujat tapsyryp, Malaıa Chýrakovka aýylynda ornalasqan páterdi zańdastyryp, tirkeýge alǵan.

Keıin zańdastyrý týraly sheshim Qostanaı oblysynyń apellıatsııalyq sotymen zańsyz dep tanyldy, óıtkeni Kenjeǵarın komıssııaǵa páterdi satyp alǵany jóninde jalǵan aqparat bergen.

Atalǵan sot sheshimi Kenjeǵarındi alaıaqtyq úshin qylmystyq jaýapkershilikke tartýǵa negiz boldy.

Shyn máninde is boıynsha jaýap alynǵan kýágerler páterdi 1997 jyly burynǵy ıesi Kenjeǵarınge 100 myń teńgege satqanyn rastaǵan. Kenjeǵarın kýágerlerdiń kózinshe aqshany qolhatsyz tapsyrǵan.

Satýshyda páterdiń ózine tıesili ekenin rastaıtyn qujattary bolmaǵan, óıtkeni ol da ony burynǵy menshik ıesimen aýyzsha kelisim negizinde alǵan.

Mundaı jaǵdaıda Kenjeǵarın azamattyq sotqa shaǵymdaný arqyly mámileni oryndaldy dep taný arqyly páter ıesimen máseleni sheshýi kerek edi.

Osylaısha Kenjeǵarınniń áreketinde qylmys belgileri joq, óıtkeni onyń alaıaqtyq nıeti bolmaǵan.

Joǵarǵy sot Bas prokýrordyń Kenjeǵarın men páter satýshysy arasynda azamattyq-quqyqtyq qatynastar týyndaǵany, ol qylmystyq qýdalaýdy boldyrmaıdy degen narazylyq ýájimen kelisti.

Bas prokýrordyń kassatsııalyq narazylyǵy boıynsha Joǵarǵy sot Kenjeǵarındi aqtady.

Jalpy, birinshi jartyjyldyqta Bas prokýrordyń kassatsııalyq narazylyǵy boıynsha 4 adam aqtaldy.

Sondaı-aq jazany jeńildetý, áreketterdi qaıta saralaý, túzeý mekemesiniń rejımin jeńildetý arqyly 82 adamnyń jaǵdaıy jaqsardy.