Jyl basynan beri aınalymnan 1 060 jalǵan banknot tárkilendi —QMA
ASTANA. KAZINFORM — Qarjylyq monıtorıng agenttigi qoldan jasalǵan aqshanyń taralýyna qarsy is-qımyl boıynsha júıeli jumysty jalǵastyryp otyr.
«Jalǵan aqsha jasaýshylardyń qurbany bolmas úshin jaqsy baǵam boıynsha aıyrbastaýdy usynsa da, beıtanys adamdarǵa aqsha aıyrbastamańyz jáne valıýtany «deldaldardan» satyp almańyz», — dep eskertti Qarjylyq monıtorıng agenttiginiń baspasóz qyzmeti.
Osylaısha, Qarjylyq monıtorıng agenttigi Almatyda iri kólemdegi jalǵan 100 dollarlyq kýpıýralardy ótkizý faktisin anyqtady. Atalǵan tulǵalar baqylamaly satyp alý barysyndaǵy jalǵan kýpıýralardy ótkizý áreketi kezinde ustaldy.
«Almatynyń eki turǵyny krıptovalıýta satyp alý jeleýimen jalpy somasy 32 700 AQSh dollaryn quraıtyn jalǵan sheteldik kýpıýrany birneshe ret satty. Sot úkimimen istiń eki qatysýshysy kináli dep tanylyp, olarǵa 5 jyldan 5,5 jylǵa deıingi merzimge bas bostandyǵynan aıyrý jazasy taǵaıyndaldy», — dep habarlady agenttikten.
Agenttikpen jyl basynan beri Qazaqstan aýmaǵynda aınalymnan 1 060 jalǵan banknot tárkilendi, onyń ishinde ulttyq valıýtada 647 100 teńge somasyna 141 kýpıýra, 90 400 AQSh dollaryna 905 kýpıýra, 2 000 eýroǵa 4 kýpıýra, 1 000 ıýan somasyna 10 kýpıýra anyqtaldy.
Tárkilengen jalǵan banknottardyń jalpy quny 43 mln teńgeden asady. Jalpy, aǵymdaǵy jyly jalǵan kýpıýralardy jasap, ótkizgeni úshin 8 adam 5 jyldan 6 jylǵa deıingi merzimge bas bostandyǵynan aıyryldy.
QMA valıýta aıyrbastaý kezinde qyraǵylyq tanytý kerektigin eskertedi.
— Qyzmeti qolma-qol aqsha aınalymymen baılanysty azamattar men qarjylyq monıtorıng sýbektilerin (EDB, aıyrbastaý pýnktteri, lombardtar jáne t. b.) jalǵan banknottar tabylǵan jaǵdaıda dereý QMA-nyń aýmaqtyq departamentterine júginýge shaqyramyz, dep eskertti agenttik baspasóz qyzmeti.
Eske sala keteıik, buǵan deıin Prezıdent Agenttiktiń jańadan taǵaıyndalǵan tóraǵasyna kóleńkeli ekonomıka deńgeıin tómendetýge jáne qarjy salasynyń ashyqtyǵyn qamtamasyz etýge baǵyttalǵan birqatar tapsyrma bergenin jazǵan edik.
