Jyl basynan beri Atyraý oblysyna 27 etnıkalyq qazaq otbasy kóship keldi
ATYRAÝ. KAZINFORM – Bıyl Atyraý oblysyna shetelden 27 etnıkalyq qazaq otbasy qonys aýdardy. Olardyń quramyndaǵy 41 adam Qazaqstanda turaqty turý maqsatymen qandas mártebesin aldy.
Qandastardy qabyldaýdyń óńirlik kvotasy aıasynda bıyl 125 oryn bólindi. Maýsym aıynda ótken komıssııa otyrysynyń sheshimimen 16 otbasydan quralǵan 48 adam óńirlik kvotaǵa engizildi. Onyń ishinde Ózbekstannan 36 adam, Qytaıdan 6 adam jáne Túrikmenstannan kelgen 6 adam bar.
Qonys aýdarǵan otbasylarǵa memlekettik qoldaý sharalary kórsetilip jatyr. Qazir 14 otbasydan turatyn 41 adamǵa otbasyn kóshirýge arnalǵan áleýmettik tólem retinde jalpy kólemi 12,4 mıllıon teńgeden astam qarjy berilgen.
Atyraý oblystyq jumyspen qamtýdy úılestirý jáne áleýmettik baǵdarlamalar basqarmasynyń bólim basshysy Gúlbolat Amanǵalıevanyń málimetinshe, qandastardy jumyspen qamtý baǵytynda da tıisti jumystar júrgizilip keledi.
– Osy jyldyń 1 maýsymyna deıin Mansap ortalyqtaryna 22 qandas júginip, jumyssyz retinde tirkeldi. Aldaǵy ýaqytta olardy turaqty jumyspen qamtý boıynsha jumystar kezeń-kezeńimen júzege asyrylady, – dedi Gúlbolat Amanǵalıev.
Mamandardyń aıtýynsha, qandastarǵa kórsetiletin áleýmettik qoldaý sharalary olardyń jańa ortaǵa beıimdelýine, turmys jaǵdaıyn jaqsartýǵa jáne eńbek naryǵyna kirigýine múmkindik beredi.
Buǵan deıin májiliste qandastardy qonystandyrý jáne olarǵa qoıylatyn talaptarǵa qatysty máseleler kóterilgenin jazǵan edik.
