Jyl basynan beri «Ata-ana akademııasy» jobasyna myńnan asa qazaqstandyq qatysty
ASTANA. KAZINFORM — Joba otbasy ınstıtýtyn nyǵaıtýǵa, ata-analardyń tárbıe jónindegi bilimin arttyrýǵa jáne jaýapty ata-ana mádenıetin qalyptastyrýǵa baǵyttalǵan, dep habarlaıdy QR Mádenıet jáne aqparat mınıstrliginiń baspasóz qyzmeti.
Qazaqstanda Mádenıet jáne aqparat mınıstrliginiń qoldaýymen júzege asyp jatqan «Ata-ana akademııasy» jobasy qarqyndy túrde júrgizilip keledi.
2026 jyly joba aıasynda el boıynsha 40 myńnan astam adamdy qamtý josparlanǵan. Qatysýshylar qatarynda ata-analarmen birge pedagogter men áleýmettik qyzmet mamandary bar.
— Joba alǵashqy oń nátıjelerin de kórsetti. 2026 jyldyń birinshi toqsanynda Qaraǵandy jáne Aqmola oblystarynda 30-dan astam bilim berý is-sharasy uıymdastyrylyp, oǵan 1000-nan astam adam qatysty. «Ata-ana akademııasy» dáris, trenıng, semınar, sheberlik sabaqtary sııaqty oqytý túrlerin zamanaýı tásildermen ushtastyrady. Sonymen qatar ataana.kz jańartylǵan onlaın-platformasy arqyly ata-analar zańger, dáriger, psıholog jáne qaýipsizdik salasynyń mamandarynan keńes alyp, qajetti oqý materıaldaryna qol jetkize alady, — delingen habarlamada.
Joba aıasynda otbasylyq ómirge psıhologııalyq turǵyda daıyndyq, qarjylyq saýattylyq, balalardyń qaýipsizdigi, sondaı-aq otbasydaǵy jaýapkershilik pen ózara túsinistikti qalyptastyrý máselelerine basymdyq beriledi.
Sonymen qatar ata-analar men pedagogterge arnalǵan ádistemelik materıaldar ázirlenip, jetekshi sarapshylardyń qatysýymen podkasttar daıyndalýda. Bul bastamalar sanaly ata-ana bolýdy keńinen nasıhattaýdy maqsat etedi.
«Ata-ana akademııasy» jobasy Qazaqstanda berik otbasylyq qundylyqtardy nyǵaıtýǵa óz úlesin qospaq. Jyl sońyna deıin 40 myńnan astam adamdy qamtý kózdelip otyr.
Elimizde otbasy saıasatyn júzege asyrý aıasynda otbasy ınstıtýtyn qoldaýǵa baǵyttalǵan júıeli jumystar da qatar júrgizilýde. Osy baǵytta Mádenıet jáne aqparat mınıstrligi BUU-nyń Halyq qonystanýy salasyndaǵy qorymen birlese «Otbasyǵa qolaıly jumys orny» jobasyn júzege asyrýda. Joba eńbek pen otbasy mindetterin ushtastyrý úshin qolaıly jaǵdaı jasaýǵa baǵyttalǵan.
2026 jyly memlekettik organdar men jumys berýshilerge arnalǵan oqytý baǵdarlamasy iske qosylyp, otbasyǵa tıimdi tájirıbelerdi engizý jáne ata-analardy qoldaıtyn korporatıvtik mádenıetti damytý kózdelgen.
Sonymen qatar elimiz boıynsha 152 Otbasyn qoldaý ortalyǵy jumys isteıdi. Olar qıyn ómirlik jaǵdaıǵa tap bolǵan azamattarǵa jan-jaqty kómek kórsetýde mańyzdy ról atqarady. 2026 jyldyń basynan beri ortalyqtarǵa 10 myńǵa jýyq ótinish túsip, 5 myńnan astam otbasy keńes aldy, taǵy osynsha otbasyǵa turaqty túrde qoldaý berilip otyr.
Bul ortalyqtar memleket pen qoǵam arasyndaǵy baılanysty nyǵaıtyp, otbasy qundylyǵyn bekitýge, qoǵamdaǵy qaýip-qaterdiń aldyn alýǵa jáne qıyn jaǵdaıdaǵy otbasylarǵa qoldaý kórsetýge qyzmet etedi.
Osyǵan deıin Dımashtyń ata-anasy bala tárbıesindegi basty qaǵıdalarmen bóliskenin jazdyq.
