Jyl basynan beri Astanada 94 adam vandalızm úshin jaýapkershilikke tartyldy
ASTANA. KAZINFORM – Astana qalasynyń prokýratýrasynyń málimetinshe jyl basynan bastap bótenniń múlkin qasaqana joıǵany nemese búldirgeni úshin 94 tulǵa ákimshilik jaýaptylyqqa tartylyp, 67 adam qamaqqa alyndy, jalpy somasy 5 mln teńge 27 adamǵa aıyppul salyndy.
4 maýsymda saǵat 16:30 shamasynda astanalyq turǵyn mas kúıinde polıtsııa bóliminde esiktiń áınegin qasaqana syndyryp, 90 myń teńge somasyna shyǵyn keltirgen. Ol 10 táýlikke qamaqqa alyndy.
Basqa jaǵdaıda 38 jastaǵy qala turǵyny Sheıh Kýnta Qajy atyndaǵy meshittiń mańdaıshalaryn julyp laqtyryp tastaǵan. Nátıjesinde ol 15 táýlikke qamaqqa alyndy.
Uqsas oqıǵa 20 mamyrda saǵat 17:30 shamasynda 20 jastaǵy elorda turǵyny qasaqana shlagbaýmdy zaqymdaǵan. Oǵan 50 AEK aıyppul salyndy.
— Prokýratýra qala turǵyndary men qonaqtaryn aınalasyndaǵylarǵa qurmet kórsetý, qoǵamdyq tártipti saqtaýǵa shaqyrady jáne atalǵan áreketterdi buzǵany úshin Ákimshilik quqyq buzýshylyq týraly kodeksiniń 147-1 babyna sáıkes 30 táýlikke deıingi merzimge qamaqqa alý túrindegi jazaǵa nemese 60 AEK mólsherinde aıyppul salýǵa alyp keletinin eskertedi, — delingen habarlamada.
Aıta ketelik elimizde jyl basynan beri qansha quqyqbuzýshylyq tirkelgeni týraly jazǵan edik.
