Jyl basynan beri Almatyda qaterli isiktiń 225 jaǵdaıy anyqtaldy
ASTANA. KAZINFORM — Jyl basynan beri Almaty qalasynda 237 308 turǵyn onkologııalyq skrınıngten ótti.
Tekserý azamattardyń tirkelgen jeri boıynsha emhanalarda tegin medıtsınalyq kómektiń kepildik berilgen kólemi (TMKKK) sheńberinde, onyń ishinde medıtsınalyq saqtandyrý júıesinde saqtandyrylmaǵan azamattar úshin de júrgiziledi.
Tekserý qorytyndysy boıynsha qaterli isiktiń 225 jaǵdaıy anyqtaldy. Onyń ishinde 215 jaǵdaı aýrýdyń erte satysynda dıagnostıkalanǵan. Bul profılaktıkalyq tekserýlerdiń tıimdiligin kórsetip, emdeýdi der kezinde bastaýǵa múmkindik beredi.
Jyl basynan beri Almaty onkologııa ortalyǵynda 14 myńnan astam patsıent mamandandyrylǵan medıtsınalyq kómek aldy. 1 100-den astam operatsııa jasaldy, olardyń 50 paıyzdan astamy az ınvazııalyq ádispen oryndaldy. 12,5 myńnan astam patsıentke hımıoterapııalyq em júrgizilse, 500-ge jýyq adam sáýlelik terapııadan ótti.
— Aýrý barynsha erte anyqtalsa, ony sátti emdeý múmkindigi soǵurlym joǵary bolady. Sondyqtan árbir azamattyń tegin skrınıngtik tekserýlerden turaqty túrde ótýi óte mańyzdy. Onkologııalyq aýrýǵa kúdik týyndaǵan jaǵdaıda patsıent «jasyl dáliz» qaǵıdaty boıynsha tekserýden ótedi. Qazaqstanda onkologııalyq aýrýlarǵa mamandandyrylǵan kómektiń tolyq kólemi — dıagnostıkadan bastap emdeýge deıin — TMKKK sheńberinde tegin kórsetiledi, — dedi Almaty onkologııa ortalyǵy dırektorynyń orynbasary Janna Qujaeva.
Aıta ketelik Skrınıngten ótý kezinde qazaqstandyq jumyskerler neni bilýi kerek týraly jazǵan edik.
