Jyl basynan beri 935 myńnan astam qazaqstandyq demalysyn Ózbekstanda ótkizgen
TAShKENT. KAZINFORM – Alǵashqy tórt aıda Ózbekstanǵa 4 mıllıonnan astam sheteldik týrıst saıahattap keldi, dep habarlaıdy Kazinform agenttiginiń Tashkenttegi menshikti tilshisi.
Ózbekstan Ulttyq statıstıka komıtetiniń málimetinshe, 4 aıda sheteldik týrısterdiń sany 29,9%-ǵa ósti. Saıahatshylardyń kóbi Qyrǵyzstan (1,14 mln adam), Tájikstan (965,4 myń adam) jáne Qazaqstannan (935 myń adam) kelgen.
Sondaı-aq, Reseı (341,8 myń adam), Aýǵanstan (161,5 myń adam) jáne Qytaı (132,2 myń adam) azamattarynyń úlesi basym.
Komıtettiń málimetinshe, saıahatshylardyń kóbi Tashkent, Samarqand, Buhara jáne Hıýa qalalarynyń kórikti jerlerin aralaǵan.
Qosa ketsek, taıaýda Ózbekstan Memlekettik keden komıtetiniń Strategııalyq josparlaý jáne kedendik rásimderdi ońtaılandyrý basqarmasynyń bastyǵy Farhod Olımjonov Kazinform agenttigine suhbat berip, saıahatshylar qaperde ustaýy tıis erejelerdi aıtqan edi.
Sondaı-aq, bıyl naýryzda Qazaqstan men Ózbekstan shekarasynda ornalasqan «Atameken — Syrdarııa» kedendik baqylaý beketi jóndeýden keıin qaıta ashyldy.
Buǵan deıin habarlaǵanymyzdaı, Centrum Air áýe kompanııasynyń ushaqtary 13 maýsymnan «Tashkent - Qostanaı - Tashkent» baǵyty boıynsha reıs oryndaı bastaıdy.
