Jyl basynan beri 91 myńnan astam muǵalim tegin biliktilikti arttyrý kýrstarynan ótti
ASTANA. KAZINFORM — Oqý-aǵartý mınıstrligi pedagogterdiń úzdiksiz kásibı damýyn qamtamasyz etý maqsatynda júıeli jumys júrgizip keledi. Jyl basynan beri elimiz boıynsha orta bilim berý júıesiniń 91 myńnan astam pedagogi tegin biliktilikti arttyrý kýrstarynan ótken.
Baǵdarlamalar bastaýysh synyp, qoǵamdyq-gýmanıtarlyq, jaratylystaný-matematıkalyq baǵyttaryndaǵy jáne dene shynyqtyrý páni muǵalimderin qamtıdy. Sondaı-aq pedagogter ınklıýzıvti bilim berý, kóshbasshylyq, ınnovatsııalar men tsıfrlyq quzyrettilik baǵyttary boıynsha da dáris tyńdady.
Onyń ishinde, 70 myńǵa jýyq sala mamany «Órleý» biliktilikti arttyrý ulttyq ortalyǵynda kýrstan ótse, 18 myńǵa jýyǵy «Órken» balalardyń ál-aýqatyn arttyrý ulttyq ǵylymı-praktıkalyq ınstıtýtynda oqytyldy. Sonymen qatar Respýblıkalyq qosymsha bilim berý oqý-ádistemelik ortalyǵy, Ulttyq ǵylymı-praktıkalyq dene tárbıesi ortalyǵy, Arnaıy jáne ınklıýzıvti bilim berýdi damytýdyń Ulttyq ǵylymı-praktıkalyq ortalyǵynda arnaıy tegin kýrstar uıymdastyryldy.
Eske sala keteıik, budan buryn 7 myńǵa jýyq pedagog biliktilikti arttyrý kýrstarynan ótip jatqanyn jazǵanbyz.