Jyl basynan beri 8,7 myńnan astam etnıkalyq qazaq qandas mártebesin aldy

ASTANA. KAZINFORM — 2024 jyldyń 1 shildedegi jaǵdaı boıynsha 8 758 etnıkalyq qazaq tarıhı otanymen tabysyp, qandas mártebesin aldy. Jalpy 1991 jyldan beri respýblıkaǵa 1 mln 137,1 myń etnıkalyq qazaq oraldy. Jyl basynan Qazaqstanǵa kelgen qandastardyń jartysy (49,5%) Qytaıdan, 34,7% – Ózbekstannan, 5,9% – Túrikmenstannan, 5,3% – Mońǵolııadan, 3,3% – Reseıden jáne 1,3% basqa elderden kelgen. Bul týraly QR Eńbek jáne halyqty áleýmettik qorǵaý mınıstrligi málim etti.

2024 jylǵy 1 shildedegi jaǵdaı boıynsha eńbekke qabiletti jastaǵy etnıkalyq qonys aýdarýshylar 59%-dy, eńbekke qabiletti jastan kishi 31,1%-dy jáne zeınetkerler 9,9%-dy quraıdy.

«Eńbekke qabiletti jastaǵy qandastardyń ishinen bilim deńgeıi boıynsha 17%-y joǵary bilimdi, 23,2%-y orta kásibı bilimdi, 55,2%-y jalpy orta bilimdi, jáne 4,6%-ynyń bilim joq», — delingen habarlamada.

Qonys aýdarǵan etnıkalyq qazaqtar respýblıkanyń túrli óńirlerine qonystandy.

Sonymen birge, qandastardy qonystandyrý úshin kelesideı eńbek kúshi tapshy óńirler anyqtaldy: Aqmola, Abaı, Qostanaı, Pavlodar, Shyǵys jáne Soltústik Qazaqstan oblystary.

Qonystandyrý óńirlerinde 2024 jylǵa arnalǵan qandastardy qabyldaý kvotasy 2 433 adamdy quraıdy. 2024 jylǵy 1 shildege jaǵdaı boıynsha qonystandyrý óńirlerine 1891 qandas qonys aýdardy.

«Joǵaryda atalǵan óńirlerde qonystanǵan qandastarǵa kóshýge sýbsıdııa túrinde memlekettik qoldaý sharalary usynylady — bir mezgilde otaǵasyna jáne otbasynyń árbir múshesine 70 AEK (258,4 myń teńge) mólsherinde; turǵyn úı jaldaýǵa jáne kommýnaldyq qyzmetterge aqy tóleýge — bir jyl ishinde 15-ten 30 AEK (55,3-den 110,7 myń teńgege deıin) mólsherinde beriledi», — dep habarlady vedomstvodan.

Jyl basynan beri 1579 qandasqa túrli qoldaý sharalary kórsetildi. Atap aıtqanda, 456 adam turaqty jumysqa ornalastyryldy.

Sonymen qatar erikti qonys aýdarýdyń tıimdiligin arttyrý maqsatynda azamattardy soltústik óńirlerge qonys aýdarýǵa qatysatyn jumys berýshilerdi qoldaý boıynsha ınstıtýtsıonaldyq sharalar qabyldandy. Turǵyn úı satyp alý, salý úshin nemese ıpotekalyq turǵyn úı qaryzdary boıynsha bastapqy jarnanyń bir bóligin jabý úshin ekonomıkalyq utqyrlyq sertıfıkaty turǵyn úı qunynyń 50%-y nemese bir otbasyna 4,28 mln teńgege deıin mólsherinde birjolǵy óteýsiz jáne qaıtarymsyz negizde engizildi.

2023 jyldan bastap pılottyq rejımde Qazaqstan elshilikteri arqyly «bir tereze» qaǵıdaty boıynsha qandas mártebesin berý tetigi iske asyryldy. Pılottyq joba sheńberinde elimizge barý, jumys orny, turǵyn úı berý múmkindikteri týraly máseleni sheshýge jáne respýblıka aýmaǵyna kirmeı-aq qandas mártebesin alýǵa bolady. Búgingi tańda etnıkalyq qazaqtardan jańa formatta 10 993 ótinish qabyldandy.