Jyl basynan beri 700 myńnan astam qazaqstandyq jumysqa ornalastyryldy
ASTANA. KAZINFORM — Bıyl 1 qarashaǵa deıin 714 myń qazaqstandyq jumysqa ornalasty. Onyń ishinde 284 myńǵa jýyq azamat jumyspen qamtýdyń belsendi sharalaryna qatysyp, túrli memlekettik jobalar aıasynda eńbekke tartyldy. Bul týraly Eńbek jáne halyqty áleýmettik qorǵaý mınıstrligi málim etti.
Vedomstvonyń málimetinshe, sýbsıdııalanatyn jumys oryndaryna 161,7 myń adam jumysqa oranalasqan, onyń ishinde: áleýmettik jumys oryndarynda 13,1 myń adam, jastar praktıkasynda 25,6 myń adam, qoǵamdyq jumystarda 98,7 myń adam, «Kúmis jas» jobasy aıasynda 17,9 myń adam, «Alǵashqy jumys orny» jobasy boıynsha 6,2 myń adam, «Urpaqtar kelisimsharty» jobasy sheńberinde 289 adam jumyspen qamtyldy.
Jańa bıznes-bastamalardy júzege asyrý úshin halyqtyń áleýmettik osal sanatyna jatatyn azamattarǵa 400 AEK-ke deıin (1 572 800 teńge) 8 968 grant berildi.
— Eńbek naryǵyndaǵy suranysqa ıe daǵdylar boıynsha onlaın oqytýmen 55,9 myń jumyssyz qamtyldy, onyń ishinde 51,4 myńy oqýdy aıaqtap, sertıfıkat aldy, — delingen habarlamada.
«Bastaý Bıznes» jobasy boıynsha kásipkerlik negizderine oqytýmen 48,4 myń adam qamtyldy, onyń ishinde 27 myń adam oqýdy aıaqtady.
Jumys berýshilerdiń ótinishi boıynsha kásiptik oqytýǵa 8 901 adam jiberildi, onyń ishinde 4 673 adam oqýdy aıaqtady. Oqýdy aıaqtaǵannan keıin 2 256 adam jumysqa ornalasty.
Budan basqa, qyzmet salasyn tańdaý maqsatynda kásiptik ortalyqtarda 331,3 myń adam áleýmettik kásiptik baǵdarlaýdan ótip, keńes berý qyzmetterin aldy.
Azamattardy jumysqa ornalastyrý birneshe baǵyt boıynsha júzege asyrylatynyn jáne shyn máninde jumysqa ornalasqandyǵy olar úshin mindetti zeınetaqy jarnalarynyń aýdarylýymen rastalatynyn atap ótken jón.
Máselen, 2025 jylǵy 1 qarashada 714 myń adam jumysqa ornalastyryldy, onyń ishinde: halyqty jumyspen qamtýǵa járdemdesýdiń belsendi sharalary sheńberinde — 170,7 myń adam; Elektrondyq eńbek bırjasynda jumys berýshiler ornalastyrǵan bos jumys oryndaryna 175,7 myń adam; Memleket basshysynyń «10 myń turǵynǵa 100 jumys orny» bastamasy sheńberinde — 333,6 myń adam; ortalyq memlekettik organdar iske asyratyn jobalar sheńberinde — 34 myń adam jumyspen qamtyldy.
Aıta keteıik, eńbek naryǵynda qazan aıynda suranys pen usynys teńesip, áleýmettik sektor kósh bastady.