Jyl basynan beri 700-den astam pavlodarlyq alaıaqtardyń qurbanyna aınaldy
PAVLODAR. KAZINFORM - Óńirde alaıaqtarǵa arbalǵan turǵyndardyń qatary azaımaı tur. Eń kóp taralǵan shemalardyń biri — «jalǵan ınvestıtsııalar».
Óńirdegi tártip saqshylary kún saıyn qashyqtan jasalatyn alaıaqtyqtyń túrli derekterine baılanysty 5-ten 10-ǵa deıin aryz-shaǵym qabyldaıdy.
Óńirlik polıtsııa departamenti kıberqylmysqa qarsy is-qımyl basqarmasynyń bastyǵy Ashat Ábetjanovtyń aıtýynsha, jyl basynan 700-den astam adam qaskúnemderden zardap shekken.
- Eń kóp taralǵan shemalardyń biri — «jalǵan ınvestıtsııalar». Alaıaqtar keleshegi zor dep sıpattalatyn jobalarǵa, krıptovalıýtaǵa nemese tanymal kompanııalarǵa aqsha salý arqyly joǵary tabys tabýdy ýáde etedi. Mundaı ýádelerge senip qalǵan keıbir azamattar óz jınaqtaryn aýdaryp, nesıe rásimdeıdi jáne qaryzǵa aqsha alady. Sondaı-aq telefon arqyly jasalatyn alaıaqtyq túrleri de keńinen taralǵan, - deıdi ol.
Ádette, qylmyskerler kezeń-kezeńimen áreket etedi. Alǵashqy kezeńde qaskóıler ózderin túrli uıymdardyń qyzmetkeri retinde tanystyryp, túrli syltaýlarmen SMS-habarlamadaǵy kodty aıtýdy suraıdy. Ekinshi kezeńde shuǵyl áreket etýdi talap etetin jasandy jaǵdaı týǵyzady. Adamǵa onyń akkaýnty buzylǵany, atyna nesıe rásimdeý áreketi jasalyp jatqany nemese bank shottaryna qaýip tóngeni týraly habarlanady. Al úshinshi kezeńde aqshany «qaýipsiz shotqa» aýdarýǵa, nesıe rásimdeýge nemese qurylǵyǵa qashyqtan qol jetkizý baǵdarlamasyn ornatýǵa kóndiredi.
- Eshqandaı «qaýipsiz shottyń» bolmaıtynyn este saqtaý mańyzdy. Bank, memlekettik organ jáne quqyq qorǵaý qurylymdarynyń qyzmetkerleri eshqashan aqsha aýdarýdy, rastaý kodtaryn berýdi nemese qurylǵyny qashyqtan basqarý baǵdarlamalaryn ornatýdy talap etpeıdi, - dep qosty basqarma bastyǵy.
Eske sala keteıik, Pavlodarda polıtseı zeınetkerdi alaıaqtardan qutqaryp qaldy.
