Jyl basynan beri 700-den astam qazaqstandyq ınternet alaıaqtarǵa aldanyp qalǵan

ASTANA. KAZINFORM – Іshki ister mınıstrliginiń resmı ókili Shyńǵys Álekeshev kezekti brıfıngide ınternet alaıaqtarǵa aldanyp nesıe alatyn qazaqstandyqtardyń azaımaı turǵanyn aıtty.

«Alaıaqtar ınternette jalǵan habarlandyrý ornalastyrý arqyly tutynýshylardy aldaýyn toqtatar emes. Qaskóıler taýar nemese qyzmettiń aqysyn aldyn ala tóletip, sońynan izin sýytyp, tutynýshyny dymsyz qaldyrady. Jyl basynan beri osyndaı 2700-den astam fakti tirkeldi. Alaıaqtardyń aılasyna túsip qalmaý úshin fıshıngtik saıttardan saq bolyńyzdar. Fıshıngtik saıt degenimiz – tanymal saıttardyń atyn jamylǵan jalǵan resýrstar. Olar azamattardyń derbes derekterin urlaý úshin shyn saıttardyń atyn jamylady. Sondyqtan braýzerdegi saıt mekenjaıyn udaıy tekserip otyrý kerek. Kúdikti siltemelerge ótpeńizder. Taýardy alǵannan keıin ǵana tólem jasańyzdar. Taýardyń bar-joǵyn tekserip alý qajet. Eger satýshy basqa qalada bolsa, sondaǵy tanystar men týystar arqyly saýda jasaǵan jón», - dedi ol.

ІІM ókili «tez baıytýdyń» ınvestıtsııalyq shemalaryna aldanýshlar da kóp ekenin aıtady.

«Investıtsııa arqyly tez baıý týraly usynystar adamdardy qyzyqtyryp jatady. Alaıaqtar azamattarǵa «joq ınvestıtsııalyq» jobalarǵa aqsha saldyryp, qarajat jymqyrady. Jyl basynan beri 700-den astam qazaqstandyq osyndaı shemanyń qurbany boldy. Ózderiniń sońǵy aqshasynan aıyrylyp, tipti, osy úshin nesıe rásimdegender de bar», - dedi Shyńǵys Álekeshev.