Jyl basynan beri 7 myń ata-ana balasyna vaktsına saldyrýdan bas tartqan

ASTANA. KAZINFORM — Elimizde balasyna vaktsına saldyrmaıtyn ata-ana kóbeıip keledi, osy jyldyń 1-toqsanynyń ózinde 7 myń adam ekpeden bas tartqan.

Bul týraly QR DSM Sanıtarııalyq-epıdemıologııalyq baqylaý komıtetiniń vaktsınamen basqarylatyn ınfektsııalardy baqylaý basqarmasynyń basshysy Nurshaı Ázimbaeva aıtty. 

— Sońǵy 2-3 jylda elimizde kóptegen eldegi sııaqty qyzylsha men kókjótel boıynsha epıdemıologııalyq qolaısyzdyq baıqalady. Bul rette, naýqastaný jaǵdaılarynyń basym kópshiligi josparly vaktsınatsııa almaǵan balalarǵa tıesili. Qyzylsha juqtyrǵandardyń 75%-dan astamy jáne kókjótelmen aýyrǵandardyń 87%-y — vaktsına egilmegender. Qyzylsha, kókjótel kórsetkishteriniń ósýi ınfektsııanyń aldyn alýda ımmýndaýdyń mańyzdylyǵyn kórsetedi. Alaıda elimizde vaktsınalaýdan bas tartýshylardyń sany jyl saıyn artyp keledi, tek aǵymdaǵy jyldyń 1-toqsanynda 7 myńǵa jýyq ata-ana balasyn vaktsınalaýdan bas tartty, — dedi ol.

Mamannyń aıtýynsha, bul jaǵdaı qyzylsha men kókjótel boıynsha aǵymdaǵy jaǵdaıǵa sózsiz áser etedi.

Aıta keteıik, buǵan deıin oqýshy qyzdar arasynda papılloma vırýsyna qarsy vaktsınanyń ekinshi dozasyn alý júrgizilgenin jazǵan edik.