Jyl basynan beri 60,5 mln tonna munaı eksporttaldy

ASTANA. KAZINFORM – Energetıka mınıstri Erlan Aqkenjenov qańtar-qyrkúıek aılaryndaǵy otyn-energetıkalyq keshenniń jaı-kúıin baıandady.

Mınıstrdiń aıtýynsha, jyl basynan beri munaı jáne gaz kondensatyn óndirý kólemi 75,7 mln tonna nemese ótken jyldyń sáıkes kezeńimen salystyrǵanda 113,2% kórsetken. Osy jylǵa jospar – 96,2 mln tonna.

– 9 aıdyń qorytyndysy boıynsha munaı eksporty 60,5 mln tonna nemese ótken jyldyń sáıkes kezeńine qaraǵanda 114,9% qurady. 2025 jylǵy jospar – 70,5 mln tonna. Gaz salasy týraly toqtalsaq, esepti kezeńde 51,6 mlrd tekshe metr gaz óndirildi nemese ótken jyldyń sáıkes kezeńimen salystyrǵanda 116,7%. Jyl sońyna deıin 62,8 mlrd tekshe metr gaz óndirý josparlanyp otyr, – dedi mınıstr Úkimettiń búgingi otyrysynda.

Sondaı-aq, qańtar-qyrkúıek aılarynda taýarlyq gazdy ishki tutyný kólemi 14,3 mlrd tekshe metr boldy. Bul kórsetkish ótken jyldyń sáıkes kezeńine qaraǵanda 100,4% qurady.

– Suıytylǵan munaı gazyn óndirý kólemi shamamen 2,3 mln tonna boldy. Bul ótken jyldyń sáıkes kezeńine qaraǵanda 101,1%. El aýmaǵy arqyly gaz tranzıtiniń kólemi – 53 mlrd tekshe metr, bul ótken jyldyń sáıkes kezeńimen salystyrǵanda 102,9% kórsetti, – dedi E.Aqkenjenov.

Aıta keteıik, búgin Úkimet otyrysynda 2025 jylǵy qańtar-qyrkúıek aılaryndaǵy áleýmettik-ekonomıkalyq damý qorytyndylary men respýblıkalyq bıýdjettiń atqarylý barysy talqylanyp jatyr.