Jyl basynan beri 600 myń gektardan astam paıdalanylmaǵan jer memleketke qaıtaryldy
ASTANA. KAZINFORM - Buryn berilgen uıǵarymdar boıynsha 102,5 myń ga alqapta aýyl sharýashylyǵy jerlerin ıgerý bastaldy.
Mundaı málimetter vıtse-premer Serik Jumanǵarınniń tóraǵalyǵymen ótken paıdalanylmaıtyn jáne zańnamany buza otyryp berilgen jerlerdi alyp qoıý jónindegi otyrysta aıtyldy.
2024 jyldyń basynan bastap Aýyl sharýashylyǵy mınıstrliginiń Jer resýrstaryn basqarý komıtetiniń aýmaqtyq bólimsheleri jalpy aýdany 321,5 myń ga jer paıdalanýshylarǵa qatysty 350 jospardan tys tekserý júrgizdi. Tekserý qorytyndysy boıynsha 192,9 myń ga alańda jer zańnamasyn buzýshylyqtardy joıý týraly 210 uıǵarym engizildi. 2024 jyldyń basynan beri 645,3 myń ga paıdalanylmaıtyn jer memleket menshigine qaıtaryldy.
«Buryn berilgen uıǵarymdar boıynsha bıyl 102,5 myń ga alańda aýyl sharýashylyǵy jerlerin ıgerý bastaldy, 477,0 myń ga alańda májbúrlep alý boıynsha sot talqylaýlary júrgizilýde», — dep habarlady aýyl sharýashylyǵy vıtse-mınıstri Azat Sultanov.
Sondaı-aq keńeste aýyl sharýashylyǵy jerlerine quqyq berý rásimderin tsıfrlandyrý boıynsha jumys barysy týraly aqparat berildi. Bul rásim Jetisý oblysy aýdandarynyń birinde pılottyq joba túrinde synaqtan ótkiziletin bolady. Pılottyq joba sheńberinde aýyl sharýashylyǵy jerlerin elektrondyq túrde berýge arnalǵan konkýrsty ótkizý pysyqtalady, ball esepteýdiń jáne memlekettik derekqorlardy ıntegratsııalaý arqyly jeńimpazdy aıqyndaýdyń jańa krıterııleri belgilenedi. Baǵalaýdyń jańa krıterııleri aýyl sharýashylyǵy janýarlarynyń basyn, aýyl sharýashylyǵy tehnıkasynyń, qyzmetkerlerdiń bolýyn, turǵylyqty jeri boıynsha tirkelýin, áleýmettik kásipkerlik tiziliminde bolýyn kózdeıtin bolady.
«Men osy jylǵa komıssııa jumysyn qaıta formattap, óńirlerdiń halqyn jaıylymmen qamtamasyz etý mindetin qoıdym, bul jumysty jedeldetý qajet. Memleket menshigine qaıtarylǵan jerler birinshi kezekte jaıylymǵa, qajet bolǵan jerlerde halyqtyń jalpy paıdalanýyna berilýi tıis. Osy máselelerdiń barlyǵyn aýyldyq okrýg ákimderimen, ásirese mal sharýashylyǵy damyǵan óńirlerde pysyqtańyz. Bıyl biz sýarý jobalaryna qarjylaı qoldaý kórsetip, jerdi qaıta qalpyna keltirip, jaıylymǵa berýge bolatyndyǵyna taldaý jasaıtyn bolamyz»,— dedi Serik Jumanǵarın.
