Jyl basynan beri 5 trln teńgege memlekettik satyp alý rásimi ótti

ASTANA. KAZINFORM — 2025 jyldyń alǵashqy úsh aıynda 5 trln teńgege 692 myń memlekettik satyp alý rásimi ótkizildi. Bul týraly Qarjy vıtse-mınıstri Dáýren Keńbeıil aıtyp berdi.

— Ótken jyldyń I toqsanynyń qorytyndysy boıynsha 1,5 trln teńgege shart jasalsa, bıyl 4 trln teńgege shart jasaldy. ıAǵnı, bıyl jalpy somasy 2,5 ese artyq shartqa qol qoıylǵan. Kórsetkishterdiń ósýine jańa zań sheńberindegi satyp alý merzimderin qysqartý men rásimderin ońtaılandyrý áser etti, — dedi D. Keńbeıil Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, memlekettik satyp alýdyń reıtıngtik-baldyq júıesi jetildirildi, bul — adamnyń qatysýynsyz, aqparattyq derekterdi qoldaný arqyly áleýetti jetkizýshilerdi aıqyndaıtyn konkýrstyq júıe. Ony ótkizý merzimi 30 kúnnen 5 kúnge deıin qysqartyldy. Búginde bul júıe boıynsha qurylys, jobalaý, tehnıkalyq qadaǵalaý jumystary satyp alynady.

— Konkýrstyq komıssııa qurylmaıdy, ıaǵnı adamı faktor joq. Bizdiń derekkózderdi qoldaný arqyly jeńimpaz avtomatty túrde anyqtalady jáne bul júıe boıynsha ótken konkýrstyń qorytyndylary shaǵymdanýǵa jatpaıdy, — dedi qarjy vıtse-mınıstri.

Onyń aıtýynsha, barlyq satyp alýlardy osy júıege kóshirý josparlanǵan. 1 qyrkúıekten bastap ortasha jóndeý jáne abattandyrý jumystary osy júıege aýystyrylady.

Eske sala ketsek, 2025 jyldyń 1 qańtarynan bastap elimizde «Memlekettik satyp alý týraly» Zań kúshine engen bolatyn. Satypalymnyń jańa tártibi jobalardy iske qosýdy jedeldetip, sybaılas jemqorlyqtyń syn-qaterin azaıtý men jergilikti bıznesti qoldaýǵa baǵyttalǵan.