Jyl basynan beri 500-den astam pavlodarlyq qarjy pıramıdalaryna aldanǵan

PAVLODAR. KAZINFORM - Jyl basynan beri 5 iri qarjylyq pıramıda anyqtalǵan. Al jalpy somasy 2 mlrd teńgeden astam qarjy turǵyndarǵa qaıtarylǵan.

Pavlodar oblysynda sońǵy jyldary qarjyny jymqyrý derekteri boıynsha 24 qylmystyq is aıaqtalǵan. Nátıjesinde 400 mln teńgeden astam qarajat memleketke qaıtarylǵan. Jyl basynan beri 5 iri qarjylyq pıramıda anyqtaldy. Bul rette «HAS», «Q-Net», «TAKORP», «Avtolıýks», «Asar Baspana» pıramıdalarynyń jumysy toqtatyldy. 500-den astam adamnyń quqyǵy qorǵaldy. Jalpy somasy 2 mlrd teńgeden astam qarjy halyqqa qaıtarylǵan.

- Bıyl qarjylyq pıramıdaǵa aqshasyn salǵan 500-den astam adam aldanǵan. Olar eń azy 100 myń teńgeden bastap, eń kóbi 100 mln teńgege deıin qarajatynan aıyrylyp otyr, - deıdi oblystyq ekonomıkalyq tergep-tekserý departamenti basshysynyń orynbasary Ǵalıasqar Qasymov.

Eske sala keteıik, Pavlodarda «TAKORP» qarjy pıramıdasyn uıymdastyrǵandarǵa sot úkimi kesildi.