Jyl basynan beri 4,7 mln adamǵa áleýmettik tólem berildi – Eńbek mınıstri

ASTANA. KAZINFORM – Memlekettiń barlyq áleýmettik mindettemeleri ýaqtyly jáne tolyq kólemde oryndalyp keledi. Bul týraly Eńbek jáne halyqty áleýmettik qorǵaý mınıstri Svetlana Jaqypova Úkimet otyrysynda baıandady.

Mınıstrdiń aıtýynsha, jyl basynan beri barlyq tólemder ındekstelgen. Bazalyq zeınetaqyny kezeń-kezeńmen arttyrý jalǵastyryldy.

− Áleýmettik tólemdermen 4,7 mln adam qamtyldy. Eńbek mınıstrliginiń bıýdjeti 6,1 trln teńgeni qurady, shamamen 3 trln teńgesi ıgerildi, − dedi Eńbek mınıstri.

Múgedektigi bar adamdardy áleýmettik qoldaý sheńberinde 285,7 mlrd teńgege járdemaqylar men tólemder tólengen.

− Portal arqyly 300 myńǵa jýyq ońaltý quraldary men qyzmetteri kórsetildi, 18,6 myń adam ınvataksıdi qoldandy. Bıyldan bastap arnaýly áleýmettik qyzmet kórsetýdi lıtsenzııalaý engizildi. Búgingi kúni 568 ortalyq lıtsenzııa aldy, − dedi S. Jaqypova.

Sonymen birge, Biryńǵaı tsıfrlyq platforma belsendi túrde engizilip jatyr. Shildeniń sońyna deıin platformaǵa barlyq óńirlerdi qosý mindeti tur.

− Bul Memleket basshysynyń tapsyrmasyna sáıkes, kómektiń ataýlylyǵyn jáne shyn kómekke zárý azamattarǵa qoldaý kórsetýge múmkindik beredi, − dedi S. Jaqypova.

Aıta keteıik, 2026 jyldan zeınetaqy men járdemaqy ósedi, buǵan 662 mlrd teńge bólinedi.