Jyl basynan beri 4,3 mln-nan asa eńbekke jaramsyzdyq paraǵy tsıfrlandyryldy – mınıstrlik
ASTANA. KAZINFORM – Densaýlyq saqtaý mınıstrligi 2024 jylǵy qańtar aıynan bastap berilgen 4,3 mıllıonnan astam eńbekke jaramsyzdyq paraǵyn tsıfrlandyrdy. Bul týraly Densaýlyq saqtaý mınıstrligi málimdedi.
Tsıfrlyq medıtsınalyq qujattarǵa kóshý burmalaý men qujatty zańsyz berýdiń aldyn alý úshin jáne anyqtama alýshylardyń ýaqyty men qarajatyn únemdeý maqsatynda júzege asyryldy.
Sonymen qatar 2025 jyldyń basynan suranysqa ıe 8 medıtsınalyq anyqtama elektrondy formatqa kóshirildi.
Olar:
Eńbekke ýaqytsha jaramsyzdyq paraǵy – aýrýhana paraǵy;
075/e «Medıtsınalyq anyqtama»;
026/ e «DKK qorytyndysy»;
073/e «KQ basqarýǵa ruqsat týraly anyqtama»;
069/e «Sanatorıılik-kýrorttyq karta»;
052-2/e «Balanyń densaýlyq pasporty»
076/e «Qarýǵa ruqsat alý»;
038/e «Eńbekke ýaqytsha jaramsyzdyq týraly anyqtama».
Sondaı-aq 2024 jylǵy 1 qańtardan bastap 2025 jylǵy 31 naýryzǵa deıin berilgen 4,3 mln-nan astam eńbekke jaramsyzdyq paraǵy tsıfrlandyryldy.
– Mınıstrlik eńbekke jaramsyzdyq paraǵyn alýdyń bıznes-protsesine reınjınırıng júrgizdi. Eńbekke jaramsyzdyq paraǵyn berý medıtsınalyq uıym qyzmetkeriniń MAJ-ǵa elektrondyq tsıfrlyq qoltańbasy qoıylǵannan keıin júzege asyrylady. Osylaısha qujattyń zańdylyǵy rastalady, - delingen mınıstrliktiń habarlamasynda.
Eńbekke jaramsyzdyq paraqtaryn ashý týraly faktiler azamattyń kelisimimen jumys berýshige beriledi. Eger buryn jumys berýshi qyzmetkerdiń jumysqa shyqqan kezdegi aýrýy týraly bilse, endi hr.enbek.kz portaly arqyly aýrýhana paraǵynyń ashylýy nemese uzartylýy týraly elektrondyq habarlama kelip túsedi. Qyzmetker úshin eńbekke jaramsyzdyq paraǵy Enbek HR mobıldik qosymshasy arqyly qoljetimdi bolady.
Sonymen qatar qyzmetker eńbek shartyn esepke alýdyń biryńǵaı júıesinde tirkelgen qoldanystaǵy eńbek sharty bar jumys berýshiniń jeke kabınetine eńbekke jaramsyzdyq paraǵyn jiberýge múmkindigi bar.
Jumys berýshiler úshin hr.enbek.kz portaldaǵy «Jeke is» modýli arqyly qyzmetkerlerdiń eńbekke jaramsyzdyq paraqtaryn óz betinshe suraý múmkindigi 2025 jylǵy 1 maýsymǵa deıin derbes derekterdi óńdeýge kelisim suratýmen qosymsha ázirlenedi.
Búgingi tańda 749 qyzmetker jańa mehanızm boıynsha 506 jumys berýshige 825 eńbekke jaramsyzdyq paraǵyn jiberdi.
Osylaısha Densaýlyq saqtaý mınıstrligi barlyq medıtsınalyq uıymda elektrondyq eńbekke jaramsyzdyq paraqtary engizilip jatyr. Biraq qaǵaz paraqtary 2025 jyldyń 1 maýsymyna deıin jumys isteıdi.
Eske sala keteıik, buǵan deıin Almatynyń densaýlyq saqtaý salasyna 344 mlrd teńge bólingenin habarlaǵan edik.