Jyl basynan beri 33,4 myńnan astam jumyskerdiń quqyǵy qorǵaldy
ASTANA. KAZINFORM — Jyl basynan beri memlekettik eńbek ınspektorlary 33,4 myńnan astam jumyskerdiń quqyǵyn qorǵady. Bul týraly Eńbek jáne halyqty áleýmettik qorǵaý mınıstrligi málim etti.
— 2025 jylǵy 1 qyrkúıektegi jaǵdaı boıynsha memlekettik eńbek ınspektorlary respýblıkanyń 257 kásiporny 3,7 myńnan astam jumyskerge 1,4 mlrd teńgege jalaqy boıynsha bereshek ekenin anyqtady. Sonymen birge túrli uıymdarda júrgizilgen tekserýler barysynda eńbek quqyǵy buzylýynyń 4,7 myńnan astam faktisi anyqtaldy, — delingen habarlamada.
Jalaqy boıynsha bereshegi jáne eńbek quqyǵynyń buzylýy anyqtalǵan kásiporyndardyń basshylaryna oryndaýǵa mindetti 2 602 uıǵarym berildi jáne 332 mln teńgeden astam somaǵa aıyppul salyndy.
Qabyldanǵan sharalardyń, onyń ishinde jalaqy boıynsha bereshekti óteýdiń qatań kesteleri men merzimderin belgileýdiń nátıjesinde 3 437 myń jumyskerdiń quqyqtary qorǵaldy. Olarǵa 1,2 mlrd teńge tólendi.
Budan basqa, eńbek zańnamasynyń saqtalýyna memlekettik baqylaýdy qamtamasyz etý máseleleri QR Eńbek jáne halyqty áleýmettik qorǵaý mınıstrliginiń erekshe baqylaýynda.
2025 jylǵy 1 qyrkúıektegi derekter boıynsha memlekettik eńbek ınspektorlary 4 013 tekserý júrgizdi, onyń barysynda 4 706 buzýshylyq anyqtaldy, onyń ishinde: eńbek salasynda — 3 965; eńbek qaýipsizdigi jáne eńbekti qorǵaý boıynsha — 721; halyqty jumyspen qamtý boıynsha — 20.
Qabyldanǵan sharalardyń nátıjesinde 30 myń jumyskerdiń eńbek quqyǵy qorǵaldy.
Buǵan deıin bıyl 292 myń qazaqstandyq jumysqa ornalasqanyn jazǵan edik.