Jyl basynan beri 250 myńǵa jýyq adam jumyspen qamtyldy
ASTANA. KAZINFORM – Elimizde jumyspen qamtý salasynda júrgizilip jatqan júıeli jumystar oń nátıjesin kórsetýde. 2026 jylǵy 1 shildedegi jaǵdaı boıynsha elimizde 249 598 adam jumysqa ornalastyryldy.
Jyl basynan beri 96 415 qazaqstandyq turaqty jumysqa ornalasty. Ótken jyldyń osy kezeńimen salystyrǵanda turaqty jumys oryndaryna ornalasqan azamattar sany 30 myńnan astam adamǵa artqan. Búginde jumysqa ornalasqandardyń basym bóligi turaqty jumyspen qamtylyp, turaqty tabys pen tolyq áleýmettik kepildikterge ıe bolyp otyr.
Sonymen qatar eńbek naryǵynyń qurylymynda da oń ózgerister baıqalady. Buryn jumyspen qamtýdyń edáýir bóligi ýaqytsha jumys oryndarynyń úlesine tıesili bolsa, búginde basymdyq uzaq merzimdi jumyspen qamtýǵa berilýde. Ýaqytsha jumysqa ornalasqandar sany 115 960 adamnan 76 953 adamǵa deıin qysqardy. Bul halyqty jumyspen qamtýdyń anaǵurlym ornyqty modeline kóshý úrdisin aıǵaqtaıdy.
Turaqty jumyspen qamtýdyń artýy eńbek naryǵyn damytý baǵytynda júrgizilip jatqan keshendi memlekettik jumystyń nátıjesi bolyp otyr. Jumys berýshilermen ózara is-qımyl keńeıtilip, Enbek.kz elektrondyq eńbek bırjasynyń tsıfrlyq servısteri jetildirilýde, sondaı-aq ekonomıkanyń naqty suranysyna beıimdelgen kásiptik oqytý baǵdarlamalary men jumyspen qamtýǵa járdemdesý sharalary iske asyrylýda.
Eńbek naryǵyndaǵy oń úrdis negizgi kórsetkishterden de kórinis tabýda. Bıylǵy jyldyń birinshi toqsanynyń qorytyndysy boıynsha jumyspen qamtylǵandar sany 9 mln 392 myń adamǵa jetip, jaldamaly jumyskerler qatary shamamen 150 myń adamǵa ulǵaıdy. Jumyssyzdyq deńgeıi 4,5%, al jastar arasyndaǵy jumyssyzdyq deńgeıi 3% deńgeıinde saqtalýda.
Mınıstrliktiń málimetinshe, aldaǵy ýaqytta sapaly jumys oryndaryn qurý, eńbek ónimdiligin arttyrý jáne azamattardyń kásibı biliktiligin damytý baǵytyndaǵy jumystar jalǵasady. Negizgi mindet – árbir qazaqstandyqtyń turaqty tabys kózine aınalatyn, resmı eńbek qatynastary rásimdelgen jáne laıyqty eńbekaqy tólenetin jumysqa ornalasýyna jaǵdaı jasaý.
Turaqty jumys oryndaryn qurý halyqtyń ál-aýqatyn arttyrýdyń, ekonomıkanyń ornyqtylyǵyn nyǵaıtýdyń jáne qoǵamdaǵy áleýmettik turaqtylyqty qamtamasyz etýdiń negizgi tetikteriniń biri bolyp qala beredi.
Aıta ketelik Enbek.kz portalynda jańa servıs – Tsıfrlyq jumyspen qamtý qyzmeti iske qosylǵan edi.
