Jyl basynan beri 232,5 myń adam ataýly áleýmettik kómek aldy

ASTANA. KAZINFORM — 2025 jylǵy 1 mamyrǵa 43,4 myń otbasyndaǵy 232,5 myń adamǵa 10,4 mlrd somasyna ataýly áleýmettik kómek taǵaıyndaldy. 2025 jyly osy maqsatqa bıýdjetten 132,9 mlrd teńge qarastyryldy.

Buryn habarlanǵandaı, AÁK-niń negizgi maqsaty — aqshalaı tólem túrinde qoldaýdy júzege asyrý jáne otbasynyń eńbekke qabiletti múshelerin jumyspen qamtýǵa járdemdesýdiń belsendi sharalaryna tartý arqyly otbasyn qıyn ómirlik jaǵdaıdan shyǵarý.

AÁK mynalardy kózdeıdi:

— tabysy kedeılik sheginen aspaıtyn azamattarǵa toqsan saıyn áleýmettik kómek taǵaıyndaý;

— tabysy az otbasylardaǵy 1 jas pen 6 jas aralyǵyndaǵy ár balaǵa 1,5 AEK mólsherinde aı saıynǵy qosymsha tólem berý. 2025 jylǵy 1 mamyrǵa AÁK alýshylar qatarynan mektep jasyna deıingi 74,4 myń balaǵa 1,4 mlrd teńge somasyna qosymsha tólem taǵaıyndaldy;

— jumysqa ornalastyrý, óz isin ashýǵa nıetti otbasylarǵa granttar berý, biliktilikti arttyrý kýrstaryna jiberý (qajet bolǵan jaǵdaıda) jáne basqalar arqyly jumyspen qamtýǵa járdemdesý.

— Qazirgi ýaqytta qazaqstandyqtar AÁK taǵaıyndaýǵa ótinishti turǵylyqty jeri boıynsha mansap ortalyǵynda, aýyl okrýginiń ákimine sondaı-aq elektrondyq úkimet portaly (egov.kz) arqyly bere alady, — delingen Eńbek jáne halyqty áleýmettik qorǵaý mınıstrligi habarlamasynda.

Esterińizge sala keteıik, 2025 jylǵy 1 qańtardan bastap Qazaqstandaǵy kedeılik shegi óńirlik medıandyq tabystyń 35% deńgeıinde, biraq óńirlik eń tómen kúnkóris deńgeıiniń 70%-nan tómen emes deńgeıde aıqyndalǵan.

Aıta ketelik ataýly áleýmettik kómekti taǵaıyndaý tártibi ózgeretini týraly jazǵan edik.