Jyl basynan beri 23 myńnan astam qazaqstandyq týrıst Tájikstanǵa barǵan
ASTANA. KAZINFORM — Tájikstannyń týrızm salasy turaqty ósim kórsetip, 2026 jyldyń qorytyndysy boıynsha 2 mıllıonnan astam sheteldik týrıst qabyldaýdy josparlap otyr, dep habarlaıdy Kazinform agenttiginiń Dýshanbedegi menshikti tilshisi.
Tájikstannyń Týrızmdi damytý komıtetiniń tóraǵasy Djamshed Djýrahonzoda eseptik baspasóz máslıhatynda 2026 jyldyń alǵashqy jartysynda elge 889,4 myń sheteldik týrıst kelgenin aıtty. Bul ótken jyldyń sáıkes kezeńimen salystyrǵanda 16,7%-ǵa kóp.
Sheteldik týrısterdiń 90%-y TMD elderinen kelgen, qalǵany alys shetel memleketteriniń azamattary.
Eń kóp týrıst Ózbekstannan kelgen – 510,4 myń adam. Odan keıin Reseı – 175,8 myń, Qyrǵyzstan – 89 myń, Qazaqstan – 23,1 myń jáne Qytaı – 22,7 myń týrıst tirkelgen.
Komıtet basshysy Tájikstan úshin ekologııalyq, agrarlyq, mádenı jáne tarıhı týrızm basym baǵyt bolyp qala beretinin atap ótti. Sonymen qatar bılik shalǵaı óńirlerde qonaqúılerdi, kempıngterdi, uıaly baılanys qyzmetin jáne týrıstik ınfraqurylymdy damytýǵa nıetti.
Onyń aıtýynsha, týrızm salasyn yntalandyrý sharalarynyń nátıjesinde 2026 jyldyń qorytyndysynda Tájikstanǵa keletin sheteldik týrıster sany 2 mıllıonnan asady dep kútilýde.
Buǵan deıin Tájikstanda Ulttyq týrızm qaýymdastyǵy qurylǵany habarlanǵan bolatyn.
