Jyl basynan beri 21 myńǵa jýyq mas júrgizýshi ustalǵan
ASTANA. KAZINFORM – Jyl basynan beri 25 myńnan astam júrgizýshi kólik basqarý quqyǵynan aıyrylǵan. Bul týraly QR ІІM Ákimshilik polıtsııa komıtetiniń tóraǵasy Qaısar Sultanbaev aıtty.
«Júrgizýshi tártibine baqylaý kúsheıtildi. 21 myńǵa jýyq mas júrgizýshi ustaldy. 10 myńǵa jýyq qarsy jolaqqa shyǵý derekteriniń joly kesildi. 25 myńnan astam júrgizýshi kólik basqarý quqyǵynan aıyrylyp, 20 myńnan astam quqyq buzýshy ákimshilik qamaýǵa alyndy. 400 myńǵa jýyq jaıaý júrginshige aıyppul salyndy. Jalpy, 2024 jyly 10 mıllıonnan astam jol erejesin buzý faktileri anyqtaldy. Bul byltyrǵy jylǵa qaraǵanda 3 mıllıonǵa artyq. Ol úshin avtomatty túrde tirkeý kameralary belsendi qoldanylýda. Olardyń kómegimen 7 mıllıonnan astam jol erejesin buzǵandar anyqtaldy», - dedi Ákimshilik polıtsııa komıtetiniń tóraǵasy OKQ alańynda ótken baspasóz máslıhatynda.
Sondaı-aq Qaısar Sultanbaev avtokólik joldaryn kútip ustaý jáne jol júrisin uıymdastyrý jumystary jaıly aıta kele, bul salada 38 myńnan astam tekserý júrgizilip, joldardy kútip ustaýda 36 myńnan astam kemshilik anyqtalǵanyn atap ótti. Osyǵan qatysty 5,5 myńǵa jýyq laýazymdy tulǵa ákimshilik jaýapkershilikke tartylǵan.
Búginde joldardy kútip ustaý qaǵıdalaryn buzǵany úshin salynatyn eń tómengi aıyppul – 55 380 teńge.
Spıkerdiń aıtýynsha, joldaǵy jaǵdaıdy baqylaý aıasynda polıtsııa tarapynan júıeli sharalar qabyldanyp jatyr. «Qaýipsiz jol», «Avtobýs», «Avtokólik», «Abaılańyz, balalar!» sekildi jedel profılaktıkalyq sharalar ótkizilip turady.
Aıta keteıik, buǵan deıin elimizdi bıyl 22 myńnan astam jol apaty tirkelip, 2 myń adam qaza bolǵanyn jazǵan edik.
