Jyl basynan beri 2 myńǵa jýyq adam jol apatynan qaza tapty — Ákimshilik polıtsııa

ASTANA. KAZINFORM — Ótken jylǵa qaraǵanda elimizde jol apatynyń sany artqan.

— Jyl basynan beri 29 myńnan astam jol apaty tirkelip, sonyń saldarynan 1 916 adam qaza tapty jáne 40 myńnan astam adam túrli jaraqat aldy. Salystyryp qarasaq, ótken jyly 22 931 jol apaty tirkelgen, 2 114 adam qaza taýyp, 29 536 adam jaralanǵan. Qurbandardyń jartysyn qarapaıym erejelerdi saqtaý arqyly aman alyp qalýǵa bolar edi. Ol degenimiz qaýipsizdik beldigin taǵý, mas kúıde kólik júrgizbeý, jolda muqııat bolý kerek, — dedi Іshki ister mınıstrligi Ákimshilik polıtsııa komıteti tóraǵasynyń orynbasary Ǵalym Sarǵulov ortalyq kommýnıkatsııalar qyzmeti alańynda ótken baspasóz máslıhatynda.

Ákimshilik polıtsııa ókiliniń aıtýynsha, jol qaýipsizdigi boıynsha jedel-profılaktıkalyq is-sharalar men aktsııalar ótkizilip turady. 

— Ótken jyldan bastap «jasyryn» patrýldeý tásili qoldanylyp jatyr. Sonymen qatar, dron arqyly baqylaý engizildi, onyń kómegimen 4 myńnan astam quqyq buzýshylyq anyqtaldy. «Tártip buzýshylarmen kúres» maqsatynda barlyq sandyq júıe men kamera «TOR» platformasyna biriktirildi. Bul platforma kólikterdiń qozǵalysyn qadaǵalaý, izdeýde júrgen kólikterdi (markasy, modeli, túsi boıynsha) anyqtaý, agressıvti júrgizýshilerdi baqylaý, úzdiksiz 8 saǵattan astam júrgen sharshaǵan júrgizýshilerdi anyqtaý mindetterin atqarady. Sonymen qatar Kólik mınıstrligimen birlesip, tasjoldarda ortasha jyldamdyqty baqylaý engizildi, — deıdi ol.

Aıta keteıik, elimizde jol apatynan zardap shekken jandarǵa ótemaqy kólemi artýy múmkin.