Jyl basynan beri 2 bala terezeden qulady: qyzylordalyq qutqarýshylar dabyl qaqty
QYZYLORDA. KAZINFORM – Jyl basynan beri Qyzylorda oblysynda balalardyń terezeden kulap ketýiniń 2 deregi tirkeldi.
Oblystyq tótenshe jaǵdaılar departamenti bul oqys jaǵdaılar oblys ortalyǵynda balalardyń qaraýsyz qalýynan bolǵanyn málimdedi.
– Ata-analardyń balalardy baqylaýsyz qaldyrýy, terezede ýaqytsha bekitkish tor nemese blokıratordyń bolmaýy, balalardyń tereze aldynda oınaýy tótenshe jaǵdaıǵa ákep soǵýy múmkin. Sondyqtan turǵyndardy úıde bala barda terezeni ashyq qaldyrmaýǵa, terezeniń tıisti qorǵaýy bolmasa, tordy senimdi tirek retinde paıdalanbaýǵa, tereze, balkon nemese shyny esiktiń aldynda oınap júrgen balalardy árkez nazarda ustaýǵa, bala terezeniń aldyna shyqpaýy úshin terezeniń janyna jıhaz koımaýǵa shaqyramyz. Qaýipsizdik sabaqtaryn ótip, úlken balalarǵa búldirshinderge qamqor bolýdy úıretýdiń mańyzy zor. Bala terezeni óz betinshe ashpaýy úshin terezege blokırator nemese tutqasyna qulyp ornatý kerek, - dedi departamenttiń basqarma bastyǵy Ashat Orazbekov.
Departament ókilderi qaýiptiń aldyn alý baǵytynda nasıhatty kúsheıtti. Jyl basynan beri 3 myńǵa jýyq turǵyn arasynda túsindirme jumysyn júrgizdi. Buqaralyq aqparat quraldarynda taqyryptyq materıaldar jarııalandy. Oqýshylarǵa qaýipsizdik erejelerin tanystyrý maqsatynda birqatar jıyn ótti.
Buǵan deıin elordalyq TJD mamandary balalardyń terezeden qulaý oqıǵalarynyń aldyn alý boıynsha ata-analarǵa úndeý jasaǵan bolatyn.
