Jyl basynan beri 159 atyraýlyq bankrot dep tanyldy
ATYRAÝ. KAZINFORM — Atyraý oblysynda jyl basynan beri 159 azamat bankrot dep tanyldy. Olardyń bank pen mıkroqarjy uıymdary aldyndaǵy jalpy bereshegi 457 mln teńgeden asqan.
Atyraý oblystyq memlekettik kirister departamentiniń málimetinshe, sottan tys bankrottyq rásimine 2 234 adam ótinish bergen. Degenmen 82 paıyzynyń ótinishi qabyldanbaǵan. Buǵan boryshkerlerdiń sońǵy bir jyl ishinde nesıe boıynsha tólem jasaýy nemese olardyń atyna tirkelgen múlkiniń bolýy sebep bolǵan.
Ótinishi maquldanǵan 130 azamattyń 133 mln teńge kólemindegi bereshegi esepten shyǵarylǵan.
Qalalyq jáne aýdandyq sottarǵa azamattardan nemese olardyń ókilderinen 590 ótinish túsken.
— Qalalyq jáne aýdandyq sotqa 590 adamnan ótinish tústi. Onyń 516-sy tólem qabiletin qalpyna keltirgisi kelse, 74-i bankrot dep tanýyn suraǵan. Sot sheshimimen 150 adamnyń aı saıynǵy tólem mólsheri azaıtyldy. Olardyń qaryzy 1 mıllıard 700 mıllıon teńge. Al 29 adam bankrot dep tanyldy. Olardyń qaryzy 324 mıllıon teńge, — dedi Atyraý oblystyq memlekettik kirister departamentiniń basqarma basshysy Elvıra Ońǵarova.
Sondaı-aq bıyl óńirde 13 kásipker bankrot dep jarııalandy. Olardyń jalpy bereshegi 19 mlrd teńgeni qurasa, onyń 805 mln teńgesi — memleket aldyndaǵy salyq bereshegi.
Al tólem qabiletin qalpyna keltirý rásimine júgingen eki jeke kásipkerdiń jalpy qaryzy 4,4 mlrd teńgeden asady. Onyń 1,3 mlrd teńgesi salyqqa qatysty.
Buǵan deıin bankrottyqty rásimdeý protsesi jeńildetilgenin jazǵan edik.
