Jyl basynan beri 15 myńnan astam jol apaty bolǵan: júrgizýshilerge talap kúsheıe me

ASTANA. KAZINFORM – Jyl basynan beri alty aıda elimizde 15 698 jol-kólik apaty bolǵan. Bul ótken jylmen salystyrǵanda 54% kóp. Jol apatynda 22 myńnan astam adam zardap shegip, 1 466 adam qaza bolǵan. Májilis depýtaty Erlan Saıyrov

– Tek bir aıdyń ishinde Qazaqstanda iri jol apattary bolyp, 25 adamnyń ómiri qıylǵan. Atap aıtqanda, Mańǵystaý oblysynda jol apatynan 10 adam, Jetisý oblysynda 10 adam, Qaraǵandy oblysynda 5 adam qaza tapqan. ıAǵnı beıbit kúnde qanshama otbasy qaıǵy jutyp, qara jamylyp qaldy. Bul óte alańdatarlyq jaǵdaı, – deıdi depýtat.

Sarapshylardyń aıtýynsha, jol apatynyń úshten biri júrgizýshilerdiń belgilengen jyldamdyqtan asyp ketkendiginen, rýlde uıyqtap ketý, qarsy jolaqqa shyǵyp ketýinen bolady.

– Jyl basynan beri Qaraǵandy oblysynyń joldarynda 49 adam qaza bolsa, sonyń úshten biri – taksıdiń qyzmetin paıdalanǵan azamattar eken. Dál osyndaı jaǵdaı respýblıkalyq mańyzy bar trassalardyń barlyǵyna derlik tán. Taksı júrgizýshilerdiń kópshiligi – jas jetkinshekter. Olar kúni-túni demalmaı úsh-tórt ret qalaaralyq reıs jasap, jolaýshy tasymaldaıdy. Túni boıy deneni sergitetin sýsyn iship, áseri bitken soń lezde uıyqtap ketedi, – dedi E. Saıyrov.

Budan bólek, qalaaralyq tasymaldaýda kóbinese oń jaq rýldi Toyota Alphard kólikteri qoldanysta. Bul aldyndaǵy kólikten basyp ozý barysynda qarsy jolaqta kele jatqan kólikti kórýge kedergi jasap, jıi jol apatyna ushyratyp jatyr. Shilde aıynyń eki kúninde Alphard kólikteriniń qatysýymen Jambyl jáne Almaty oblystarynda eki iri jol apaty boldy. Onda on adam qaza taýyp, taǵy tórteýi jaraqat aldy.

– Máselen, AQSh-ta júrgizýshilerge qoıylatyn talap óte qatań. Taksı qyzmetin kórsetý úshin árbir júrgizýshiniń jeke basy, densaýlyǵy, sottylyǵy, júrgizýshi kýáligi, tynyǵýy tolyq súzgiden ótkiziledi. Eger júrgizýshi jolda jyldamdyqty shekten tys arttyrsa, jol polıtsııasy aıyppul salyp, birden Uber júıesine málimet jiberedi. Ol dereý júrgizýshi akkaýntyn 2 jylǵa jaýyp tastaıdy. Bizdiń elimizde de osyndaı sharalar engizilýge tıis. Óıtkeni jolda azamattardyń qaýipsizdigin qamtamassyz etý maıdanǵa aınalyp otyr, – dedi Májilis depýtaty.

E. Saıyrov agregatorlar jol júrý erejelerin jıi buzatyn júrgizýshilerdi, oń rýldi mashınalar men eki esikti mashınalardy jolǵa shyǵarmaýy keregin aıtýda. Qalaaralyq reıs bolsa, reıs aldynda tehnıkalyq jáne medıtsınalyq baqylaýdan ótýi kerek.

Sondaı-aq servıster avtomobılderdiń tehnıkalyq jaǵdaıy men júrgizýshilerdiń biliktiligin tekserip, talapqa saı kelmegenderdi shektep otyrýy qajet.

Aıta keteıik, astanalyq «Jeńis» fýtbol komandasynyń oıynshysy Vıktorııa Kaısarınova Astana – Pavlodar trassasynda jol apatynan qaza tapty.