Jyl basynan beri 1,3 mln qazaqstandyq Ózbekstanǵa saıahattap barǵan

TAShKENT. KAZINFORM – Bıyl 11 aıdyń ishinde Ózbekstanǵa 1,3 mıllıonnan astam qazaqstandyq týrıst barǵan, dep habarlaıdy Kazinform agenttiginiń menshikti tilshisi.

Ózbekstannyń Týrızm komıtetinen málim etkendeı, bıyl qańtar-qarasha aralyǵynda bul elge týrıstik maqsatpen 7,3 mln sheteldik azamat kelgen. Ótken jyldyń sáıkes kezeńimen salystyrǵanda saıahatshylar sany 18,8%-ǵa kóp.

Bul rette Ózbekstanǵa kelgen týrıster kóshin Tájikstan (2,1 mıllıonnan astam týrıst) bastap tur. Odan keıingi oryndarǵa 2,1 mln týrıstpen Qyrǵyzstan jáne 1,3 mln saıahatshymen Qazaqstan jaıǵasqan.

Eske salaıyq, byltyr 1,2 mln qazaqstandyq Ózbekstanǵa týysqandarymen kórisý úshin barǵan.

Qosa ketsek, bıyl Ózbekstan 2,2 mln qazaqstandyq saıahatshyny qabyldaýdy josparlaǵan edi.