Jyl basynan beri 1200-den astam zańsyz qarý tárkilendi — ІІM
ASTANA. KAZINFORM — Іshki ister mınıstrligi quqyqtyq tártipti nyǵaıtý jáne zańsyz qarý aınalymyn toqtatý boıynsha keshendi sharalardy jalǵastyryp otyr. Bul týraly Polisia.kz jazdy.
Bıyl bes aıda «Qarý» jáne «Quqyqtyq tártip» jedel-profılaktıkalyq is-sharalary barysynda qylmystyq aınalymdaǵy 1200-den astam qarý tárkilendi.
Onyń ishinde:
- 18 avtomat;
- eki granataatqysh; 320-dan astam tapansha;
- 100-den astam oıyq uńǵyly qarý;
- 700 tegis uńǵyly myltyq;
- qańtar oqıǵasy kezinde qoldy bolǵan 120 qarý da bar.
— Mamyr aıynda Almaty qalasy men Almaty oblysynda tirkelmegen birqatar qarý tárkilendi. Olardyń arasynda qańtar oqıǵasy kezinde ońtústik megapolıstegi qarý dúkenderinen urlanǵan qarýlar da anyqtaldy. Sonymen qatar 20 sáýirden bastap jyl sońyna deıin halyqtan zańsyz saqtalǵan atys qarýyn, oq-dáriler men jarylǵysh zattardy satyp alý aktsııasy júrgizilýde. Búgingi kúni azamattar shamamen 750 túrli qarý men 4 myńǵa jýyq oq-dárini erikti túrde tapsyrdy. Іshki ister mınıstrligi zańsyz saqtalǵan qarýdy óz erkimen tapsyrǵan azamattar qylmystyq jáne ákimshilik jaýapkershilikten bosatylatynyn eske salady. Azamattardy saqtaýǵa zańdy negiz joq qarýdy tapsyryp, qoǵamdyq qaýipsizdikti qamtamasyz etýge óz úlesterin qosýǵa shaqyramyz, — dedi ІІM krımınaldyq polıtsııa departamentiniń bastyǵy Qanat Nurmaǵambetov.
Eske sala keteıik, Almatyda avtokólikten qarý men pyshaq tabylǵan bolatyn.
