Jyl basynan beri 12 myńǵa jýyq bala qyzylsha aýrýyn juqtyrǵan

Elimizde jyl basynan beri 12 myńǵa jýyq bala qyzylsha aýrýyn juqtyrǵan. Onyń 80%-y 14 jasqa tolmaǵan balalar, dep habarlaıdy Kazinform.

Ótken aptamen salystyrǵanda qyzylsha juqtyrǵandar sany birden 30%-ǵa artqan. Naýqastardyń 80%-y vaktsına almaǵan. Ásirese, Almaty, Jambyl oblystary men Shymkent, Almaty, Aqtóbe qalalarynda aýrý dendep tur.

Qyzylsha aýrýynyń alǵashqy belgileri: qurǵaq jótel, joǵary temperatýra, bas aýrýy, júrek aıný, kózdiń shyryshty qabyǵynyń qyzarýy, álsizdik jáne tábettiń joǵalýy, aýyz qýysynda aq bórtpelerdiń paıda bolýy. Al qyzyl bórtpeler qulaq, moıyn aımaǵynan bastalyp denege birtindep shyǵady.

Qyzylsha jelsheshekke qaraǵanda aýyr jáne estý qabiletiniń tómendeýi ákelýi múmkin. Sondaı-aq aýrý órshise naýqas bronhıt, pnevmonııa, otıt, entsefalıt, enterokolıt, menıngıtke shaldyǵady. Qyzylshany emdeýge arnalǵan arnaıy preparattar joq. Naýqastyń jaǵdaıyna qaraı tek sımptomatıkalyq em júrgizeldi.

Qyzylshanyń aldyn-alý negizgi jáne eń tıimdi ádisi – vaktsınatsııa. Profılaktıkalyq egýlerdiń ulttyq kúntizbesine sáıkes qyzylshaǵa qarsy josparly ekpe 12-15 aılyq sábılerge jáne 6 jasynda qaıtadan júrgiziledi. Vaktsınatsııadan keıingi ımmýnıtet – igg antıdeneleri qanda 10 jastan 18 jasqa deıin saqtalady. Qyzylshaǵa qarsy ımmýnıtettiń kúshin baqylaý úshin eresekter 5 jyl saıyn qyzylshaǵa qarsy igg antıdeneleriniń deńgeıin tekserip otyrýy qajet.

Búginde elimizde qyzylshaǵa qarsy qosymsha vaktsına salynyp jatyr. Vaktsınatsııa jergilikti emhanalarda júrgiziledi. Qyzylshanyń basty bilgeleri men em joldary týraly tolyq málimetti ««Jibek Joly» arnasyndaǵy «Bizdiń dáriger» habarynyń 07.11.23 kúngi sanynan kóre alasyzdar.