Jyl basynan beri 11,5 myńnan astam bala júzýdi úırendi

ASTANA. KAZINFORM — Shomylý maýsymy bastalar aldynda Tótenshe jaǵdaılar mınıstrligi halyq arasynda qaýipsizdik máselesin túsindirý jumysyn ótkizip jatyr. Tolyǵyraq Tótenshe jaǵdaılar mınıstrligi azamattyq qorǵanys jáne áskerı bólimder komıteti tóraǵasynyń orynbasary Aqylbek Ahmetjanov aıtyp berdi. 

— Jyl basynan beri sýǵa túsý qaýipsizdigi taqyrybynda teledıdarda 1 081 sıýjet, radıoda 2 273 aqparat, gazetterde jáne áleýmettik jelilerde 1 369 maqala jarııalandy. Sondaı-aq messendjerlerde 7 462 jazba jáne áleýmettik jeliler arqyly 343 tikeleı efırde túsindirý jumystary uıymdastyryldy. Atalǵan is-sharalar 3 mln jýyq adamdy qamtydy, onyń ishinde 650 myńǵa jýyq bala bar. Sonymen qatar jyl basynan beri 11 562 balaǵa júzý úıretildi, bul jumys jalǵasyn tabady, — dedi Aqylbek Ahmetjanov ortalyq kommýnıkatsııalar qyzmeti alańynda ótken baspasóz máslıhatynda.

Odan bólek, turǵyndarǵa jadynama taratylyp, shomylýǵa ruqsat aýmaqtarǵa 181 qaýipsizdik belgileri ornatylǵan.

— Jergilikti ákimdikter balalarǵa qaýipsiz jaǵajaılar daıyndap jatyr, ol jerde qutqarýshylar balalardy júzýge úıretedi. Sol sııaqty sý qaýipsizdigi týraly aqparattar mınıstrlik pen óńirlik departamentteriniń resmı saıttary men áleýmettik jelilerde ornalastyrylǵan, — deıdi ol.

Keshe Aqtóbede 4 jasar bala sýǵa batyp ketti.