Jyl basynan beri 15 myń balanyń quqyǵy qorǵaldy

ASTANA. KAZINFORM – Bıyl arnaıy jasaqtalǵan mobıldi toptar 400-den astam otbasyn tekserip, 15 myń balanyń quqyǵyn qorǵady. Bul týraly Májilis depýtattarynyń saýalyna Premer-Mınıstrdiń orynbasary Ermek Kósherbaevtyń jaýabynda aıtylǵan.

- Ótken jyldan bastap árbir bilim berý mekemesine kámeletke tolmaǵandar isi jónindegi ınspektorlar, ýchaskelik polıtsııa ınspektorlary jáne jedel ýákilder bekitildi. Olar apta saıyn mektepter men kolledjderde profılaktıkalyq sharalar ótkizedi. Oqý oryndarynyń janynda jol qaýipsizdigi men qoǵamdyq tártipti qamtamasyz etý maqsatynda patrýldik polıtsııanyń marshrýttary bilim berý mekemeleriniń janynan ótedi, - dedi vıtse-premer jaýabynda.

Sondaı-aq, onyń atap ótýinshe, quqyq buzýshylyqtardyń aldyn alýǵa jáne balalardyń jol júrý qaýipsizdigin qamtamasyz etýge baǵyttalǵan jedel profılaktıkalyq sharalar jáne «Jasóspirim», «Qaýipsiz balalyq shaq», «Túngi qaladaǵy balalar», «Nazar aýdaryńyzdar - balalar!» aktsııalary aı saıyn ótkizilip turady.

- Quramynda polıtsııa qyzmetkerleri, qamqorshylyq jáne qorǵaý organdarynyń mamandary, prokýratýra, áleýmettik qorǵaý, densaýlyq saqtaý, psıhologtar, balalardyń quqyqtary jónindegi aımaqtyq ýákilder, úkimettik emes uıymdar ókilderi kirgen jergilikti atqarýshy organdar janyndaǵy mobıldi toptar bıyl 400-den astam otbasyn tekserip, 15 myń balanyń quqyǵyn qorǵaýdy qamtamasyz etti. Sonymen qatar quqyq buzýshylyqtardyń aldyn alýdyń jańa júıesin engizýge, erte profılaktıkaǵa, zańǵa baǵynatyn azamatty qalyptastyrýǵa, mektepishilik pedagogıkalyq súıemeldeýdi retteýge jáne basqa da máselelerge baǵyttalǵan kontseptýaldy jańa jalpy «Quqyq buzýshylyqtardyń aldyn alý týraly» Zań ázirlendi, - dedi Ermek Kósherbaev.

Buǵan deıin balalardyń quqyǵyn qorǵaıtyn bólek basqarma qurylǵanyn jazǵan edik.