Jyl aıaǵyna deıin eldegi áýe kompanııalary jańa 6 ushaq alady
ASTANA. KAZINFORM — 2026 jyly taǵy 11 halyqaralyq baǵytty ashý nemese qaıta iske qosý josparlanǵan. Bul týraly búgin Úkimet otyrysynda Kólik mınıstri Nurlan Saýranbaev málim etti.
— Otandyq jáne sheteldik áýe kompanııalar Qazaqstannyń halyqaralyq baǵyttaryn kóbeıtip jatyr. 2026 jyly jańa halyqaralyq baǵyttardy ashý jalǵasyp jatyr. Qazirdiń ózinde 4 jańa reıs ashyldy (Almaty–Shanhaı, Astana–Erevan, Atyraý–Tashkent, jáne Aqtaý–Erevan). Sonymen qatar, 2026 jyly taǵy 11 halyqaralyq baǵytty ashý nemese qaıta iske qosý josparlanyp otyr, — dedi Nurlan Saýranbaev.
Onyń aıtýynsha, qazir álemdik avıatsııadaǵy basty máselelerdiń biri — ushaq tapshylyǵy. Jańa ushaqty kútý tym uzaq.
— Mysaly, búgin tapsyrys berse, ony tek 8–10 jyldan keıin alady. Byltyr Amerıkada Boeing kompanııasymen otandyq kompanııalar 15 mlrd AQSh dollaryna kelisimge otyrdy. 2026 jyly 3 ushaq satyp alyndy, onyń ishinde osydan bir aı buryn Scat avıakompanııasyna bir kúnde 2 jańa zamanaýı Boeing kelgen. Osy jyldyń aıaǵyna deıin qazaqstandyq avıakompanııalardyń parkine taǵy 6 ushaq qosylady, — dedi mınıstr.
Buǵan deıin qazaqstandyq áýe kompanııalaryna Taıaý Shyǵystaǵy jaǵdaı qalaı áser etip jatqanyn jazǵan edik.
2025 jyly qazaqstandyq áýe kompanııalar 15 mln jolaýshy tasymaldady. Bıylǵy alǵashqy 4 aıda jolaýshylar sany 4 mln-nan asty.
