JI qoldanatyn oqýshynyń bilimin muǵalim qalaı baǵalaýy kerek

ASTANA. KAZINFORM — Mektepterde jasandy ıntellektini qoldaný standarty bekitilgen bolatyn. Qujattyń bilim berý júıesine ákeletin ózgeristerin Oqý-aǵartý mınıstrligi Orta bilim komıteti basqarmasynyń basshysy Asyl Túımebaev túsindirdi.

JI qoldanatyn oqýshynyń bilimin muǵalim qalaı baǵalaýy kerek
Vıdeodan alynǵan kadr

Onyń aıtýynsha, standart muǵalimder men oqýshylardyń jasandy ıntellektini saýatty ári jaýapkershilikpen paıdalanýyna baǵyttalǵan. Qujatta JI-di qoldaný mádenıeti, derekterdi qorǵaý, akademııalyq adaldyq pen quqyqtyq retteý talaptary qamtylǵan.

— Jasandy ıntellekt bilim berý salasyna endi ǵana keńinen enip jatyr. Muǵalimder ony oqý úderisinde qalaı qoldaný kerektigin árdaıym bile bermeıdi. Sondyqtan mınıstrlik arnaıy standart bekitti. Onda JI-di paıdalanýdyń negizgi qaǵıdalary men talaptary aıqyndalǵan, — dedi ol Jibek Joly telearnasyndaǵy «Búgin Live» baǵdarlamasynda.

Standarttaǵy mańyzdy talaptardyń biri — akademııalyq adaldyqty saqtaý. ıAǵnı oqýshy JI daıyndaǵan jaýapty óz jumysy retinde usynbaýy kerek. Al ony qandaı tapsyrmada jáne qalaı qoldanýǵa bolatynyn muǵalim belgileıdi.

— Qazir jasandy ıntellektini tolyq shekteý múmkin emes. Biraq ony barlyq tapsyrmada erkin qoldanýǵa da bolmaıdy. Sondyqtan tepe-teńdik saqtalyp, sheshim qabyldaý pedagogtiń quzyretine beriledi. Muǵalim sabaq bastalǵanǵa deıin qaı tapsyrmany JI kómegimen, qaısysyn onsyz oryndaý kerektigin túsindirýi tıis. Oqýshy ony daıyn jaýapty kóshirý úshin emes, tapsyrmany oryndaý joldaryn túsinýge kómektesetin qural retinde paıdalanýy kerek. Al pedagogter JI kómegimen sabaqqa daıyndalyp, oqý kontentin ázirleı alady, — dedi basqarma basshysy.

Standartpen qatar, mınıstrlik JI quraldaryn mektep tájirıbesine engizý jumystaryn júrgizip jatyr. Atap aıtqanda, tehnologııa shaǵyn mektepterde synaqtan ótkizilýde. Qarasha-jeltoqsan aılarynda pılottyq jobaǵa qatysatyn mektepter sanyn 50-ge deıin jetkizý josparlanǵan.

Pedagogterdiń jańa tehnologııalardy meńgerýine de basymdyq berilip otyr. Búginge deıin 340 myńnan astam muǵalim JI-di oqý úderisinde tıimdi qoldaný boıynsha tegin onlaın kýrstan ótken. Sonymen birge Qazaqstanda OpenAI kompanııasymen birlesip, bilim berý júıesine JI quraldaryn engizýge baǵyttalǵan ulttyq joba bastaldy.

— Joba aıasynda 165 myń pedagogke bilim berý maqsattaryna beıimdelgen ChatGPT Edu júıesine qoljetimdilik beriledi. Lıtsenzııa mektepke deıingi uıymdarǵa, mektepterge, kolledjder men joǵary oqý oryndaryna, ǵylymı-zertteý ınstıtýttary men Astana Hub-qa taratylady, — dedi Asyl Túımebaev.

Buǵan deıin ata-analar men pedagogterdiń usynysyn jınaqtaıtyn platforma iske qosylatynyn jazǵan edik.