JI qatelesse, túrmege kim otyrady — Lı Kaı Fý jańa dáýir mamandary týraly

Onyń pikirinshe, Qazaqstan jasandy ıntellektini damytý úshin qolaıly jaǵdaı qalyptasqan elderdiń birine aınaldy. Buǵan memlekettik deńgeıdegi qoldaý, ınfraqurylymnyń damýy jáne jańa tehnologııalardyń túrli salalarǵa engizilýi múmkindik berip otyr.

— Qazaqstan búginde álemdegi eń qolaıly pozıtsııalardyń birinde dep aıtar edim. Bolashaqqa kóz júgirtsek, bir jaǵynan, el aldynda úlken múmkindikter tur. Olardy iske asyrý úshin kóshbasshylyq, tabandylyq, jasandy ıntellektini túsiný jáne ony memlekettik sektorda, ınkýbatorlarda, venchýrlik qorlar men iri kompanııalarda engizý qajet. Bul baǵytta qazirdiń ózinde jumys júrip jatyr, — dedi Kaı-Fý Lı elordada ótip jatqan AI & Digital Bridge 2026 forýmynda.

Sarapshy jasandy ıntellektini odan ári damytý jańa tehnologııamen tıimdi jumys isteı alatyn mamandardy daıarlaýǵa tikeleı baılanysty ekenin aıtty. Sondyqtan mundaı daǵdylardy qazaqstandyqtarda bala kezden qalyptastyrý qajet.

— Ýnıversıtetter men mektepterde bilim alatyn adamdar JI kúndelikti protsesterdiń ajyramas bóligine aınalǵan ortada jumys isteýdi úırenýi kerek. Sondyqtan bilim berýdi bastapqy kezeńnen-aq jasandy ıntellektini paıdalanýǵa beıimdeý asa mańyzdy, — deıdi sarapshy.

Kaı-Fý Lı osy oraıda DRI (Directly Responsible Individual) tujyrymdamasyn mysalǵa keltirdi. Bul — belgili bir mindet pen onyń nátıjesine tikeleı jaýapty adam. Atalǵan uǵymdy Stıv Djobs engizip, keıin tehnologııa salasynda keńinen qoldanyla bastaǵan.

Spıkerdiń pikirinshe, JI dáýirinde mundaı mamandardyń róli ózgeshe sıpatqa ıe bolady.

— Іri kompanııalar bir nárseni túsinýi kerek: búgingi jetistikke jetkizgen tásilder bolashaqta da sol nátıjege jetkize bermeıdi. Adamdardy basqarýǵa qurylǵan ıerarhııalyq júıe adam resýrsyn basqarýǵa tıimdi. Alaıda endi kompanııalarǵa JI-di keńinen engizý qajet. Al bul JI júıelerin basqara alatyn mamandardy talap etedi. Sizderde adamdardy basqara alatyn mamandar bar. Biraq jasandy ıntellektini basqara alatyn mamandar bar ma? — dedi ol.

Sonymen birge, Kaı-Fý Lı jasandy ıntellektini engizý adamnyń óz jumysynyń saldary úshin jaýapkershiligin joımaıtynyn atap ótti.

— Eger JI qatelik jasap, sonyń saldarynan aqsha joǵaltsańyz, bank shotyńyz bosap qalsa nemese zań buzylsa, ol úshin JI túrmege otyrmaıdy. Túrmege adam otyrady. Sebebi sol adam tikeleı jaýapty tulǵa (DRI) bolady. Sondyqtan DRI kreslosyna shalqaıyp otyryp, eshteńe istemeı, barlyq jumysty JI-ǵa tapsyra almaıdy. Ol jasandy ıntellektini belsendi túrde basqaryp, ony túsinip, jumysqa engizýi kerek, nátıjesin tekserip, jaýapkershilikti óz moınyna alýy kerek. Áıtpese DRI-dyń óz oılaý qabileti de birtindep álsireı bastaıdy, — dedi ol.

Eske salaıyq, Astanada AI & Digital Bridge 2026 halyqaralyq forýmy bastaldy. Qazaqstan JI-ekonomıkanyń barlyq bes deńgeıin damytýdy kózdep otyr.