Jıyrma jyl boıy izdeýde júrgen kúdikti Qazaqstanǵa ekstradıtsııalandy
ASTANA. KAZINFORM – Qazaqstan azamaty adamdar tobymen jasalǵan qaraqshylyq shabýylǵa qatysy bar degen kúdikpen Reseı Federatsııasynan ekstradıtsııalandy.
QR Bas prokýratýrasynyń málimetinshe, kúdikti qylmystyq jaýaptylyqqa tartý úshin elge jetkizilgen.
Tergeý derekterine sáıkes, ol 2006 jyly Pavlodar qalasynda bir top adammen birge qarý retinde paıdalanylǵan zattardy qoldanyp, qaraqshylyq shabýyl jasaǵan.
– Kúdikti men onyń sybaılastary jábirlenýshiniń múlkin ashyq túrde ıemdengen, – delingen habarlamada.
Qylmysqa qatysy bar ózge tulǵalar ártúrli merzimge bas bostandyǵynan aıyrylǵan.
Al kúdikti quqyq qorǵaý organdarynan jasyrynǵandyqtan halyqaralyq izdeýge jarııalanǵan.
– Ol 2025 jylǵy qyrkúıekte Reseıdiń Novosibir oblysynda ustalyp, Qazaqstan Bas prokýratýrasynyń suraýy boıynsha ekstradıtsııalandy, – dep habarlady vedomstvo.
Qazirgi ýaqytta kúdikti tergeý ızolıatoryna qamaldy.
Atalǵan qylmys úshin múlki tárkilenip, 10 jylǵa deıin bas bostandyǵynan aıyrý jazasy qarastyrylǵan.
Aıta keteıik, buǵan deıin alaıaqtyq jasaǵan kúdikti Reseı Federatsııasynan ekstradıtsııalandy.
