Jıyn-terim aıaqtalýǵa jaqyn: Astyq saqtaıtyn qoımalar jetkilikti me

ASTANA. KAZINFORM – Elimizde astyq jınaý jumystary aıaqtalyp qaldy. Endigi maqsat – saqtaý sharalaryn júıeli uıymdastyrý. Osy rette, Aýyl sharýashylyǵy mınıstrligine habarlasyp, astyq saqtaıtyn qoımalardyń jaǵdaıyn surap bilgen edik.

Belgili bolǵandaı, elimizde saqtaý syıymdylyǵy 13,2 mıllıon tonnadan asatyn 191 lıtsenzııalanǵan astyq qabyldaý kásiporny bar eken.

«Astyqty qabyldaý úshin astyq óńdeý zaýyttarynyń materıaldyq-tehnıkalyq bazasyn daıyndaý jumystary josparly júrgizildi. Aýyl sharýashylyǵy taýaryn óndirýshilerdiń ıeliginde syıymdylyǵy 15,8 mln tonnany quraıtyn astyq saqtaý qoımasy bar. Boljanǵan astyq kólemin eskersek, konteınerler astyqty saqtaýǵa jetkilikti», - dedi QR Aýyl sharýashylyǵy mınıstrliginiń baspasóz qyzmeti agenttik tilshisine bergen jaýabynda.

Aıta keteıik, astyqtyń saqtalýyn qamtamasyz etý úshin jańa astyq qoımalaryn salý jáne qoldanystaǵylaryn keńeıtý arqyly elevatorlyq qýatty arttyrý jóninde sharalar qabyldanǵan. Osylaısha, 2024-2026 jyldary syıymdylyǵy 30,2 myń tonnany quraıtyn 5 astyq qoımasyn iske qosý josparlanyp otyr.

Eske sala keteıik, buǵan deıin elimizde 8 mln tonnaǵa jýyq astyq bastyrylǵanyn jazǵan bolatynbyz.