Jıgýlı Daırabaevqa qajetti qoldy 3-4 kúnde jınaımyz – «Aýyl» partııasy

ASTANA. QazAqparat – «Aýyl» halyqtyq-demokratııalyq patrıottyq partııasy tóraǵasynyń birinshi orynbasary Tóleýtaı Raqymbekov uıym atynan QR prezıdenttigine usynylǵan Jıgýlı Daırabaevty qoldaý paraqshalaryn 3-4 kúnniń ishinde jınap tapsyra alatyndaryn aıtty, dep habarlaıdy QazAqparat tilshisi.

«Kandıdat Jıgýlı Daırabaevty qoldaý paraqshalaryn qansha ýaqyttyń ishinde jınap ákelýdi josparlap otyrsyzdar?», dep surady BAQ ókili Ortalyq saılaý komıssııasynda ótken brıfıngide.

Tóleýtaı Raqymbekovtiń aıtýynsha, zań talabyna sáıkes qajetti qoldy jınaýǵa «Aýyl» partııasynyń áleýeti tolyq jetkilikti.

«Qazir óńirlik fılıaldardyń ókilderi qol qoıatyn paraqshalardy alyp ketýge keledi. Meniń oıymsha, 3-4 kúnniń ishinde jınap bitiremiz dep oılaımyn. Esterińizge sala keteıin, bizdiń partııanyń ózinde 300 myń múshe bar. Zańnyń talaby boıynsha 118-119 myńdaı qol jınaý kerek», - dedi ol.

Aıta keteıik, búgin Ortalyq saılaý komıssııasy «Aýyl» partııasynan prezıdenttikke usynylǵan Jıgýlı Daırabaevtyń kandıdatýrasyn talaptarǵa saı degen qorytyndy shyǵardy.

Keshe Ortalyq saılaý komıssııasy halyq koalıtsııasy usynǵan Qasym-Jomart Toqaev pen «Amanat» Qazaqstan kásipodaqtar dostastyǵy» respýblıkalyq birlestigi usynǵan Meıram Qajykenniń QR prezıdenttigine kandıdat retinde sáıkestigin belgileý týraly qaýly qabyldaǵan bolatyn.

Sondaı-aq keshe «Kásibı áleýmettik jumyskerler Ulttyq alıansy» respýblıkalyq qoǵamdyq birlestiginen prezıdenttikke usynylǵan Qaraqat Ábden OSK-ǵa qujattaryn tapsyrdy.

Al «Aýyl» partııasynan prezıdenttikke úmitker Jıgýlı Daırabaev lıngvıstıka emtıhanynan ótti.