Jıgýlı Daırabaev: Otstavkaǵa ketkennen góri qazaq halqyna paıdam kóp tıedi

ASTANA. QazAqparat – Májilis depýtaty Jıgýlı Daırabaev isti bolǵan balalary úshin keshirim suraý jóninde suraqtarǵa jaýap berdi, dep habarlaıdy QazAqparat tilshisi.

Májilis kýlýarynda jýrnalıster depýtattan balalary úshin nege keshirim suramaıtynyn bilgisi keldi.

«Maǵan qoıatyn kináńiz bolsa, sony aıtyńyz, sol úshin keshirim suraımyn. Balalar óz tirligine ózderi jaýap beredi. Aıyp etpeńizder», - dedi J. Daırabaev.

Tilshiler «Balalaryńyzǵa nashar tárbıe berdińiz be?» degen suraq qoıdy.

«Ony ýaqyt kórsetedi, aldyn ala sáýegeılik jasaı almaımyn. Quqyq qorǵaý organdary ózderi sheshedi. Sottyń jumysyna men aralasa almaımyn», - dep jaýap berdi depýtat.

Sóz sońynda shetelde osyndaı jaǵdaı bolsa, laýazymdy tulǵalar otstavkaǵa ketetini aıtylyp, J. Daırabaevtyń depýtattyq mandatty nege tapsyrmaıtyny suraldy.

«Men otstavkaǵa ketkennen góri qazaq halqyna ózderiń sııaqty paıdam kóp tıedi. Aýyl sharýashylyǵyn damytamyz», - dedi ol.

Budan buryn habarlanǵandaı, Taraz qalasynyń soty alaıaqtyq jasady jáne iri mólsherde aqsha jymqyrdy dep aıyptap, úkim shyǵarǵan eki kúdiktiniń Májilis depýtaty Jıgýlı Daırabaevtyń uldary ekeni belgili boldy.

Májilistegi «Aýyl» partııasy fraktsııasy depýtaty Jıgýlı Daırabaev mandatyn tapsyrmaıtynyn málimdedi.

Birneshe kúnnen beri áleýmettik jelide J.Daırabaevtyń turǵyn úı jáne jer máselesine qatysty daýlarǵa qatysy týraly aqparat taraı bastady. Búgin depýtat jelide taraǵan aıyptaýlarǵa jaýap berdi.