Jıgýlı Daırabaev Ortalyq saılaý komıssııasynda qazaq tilinen emtıhan tapsyryp jatyr

ASTANA. QazAqparat – Prezıdent saılaýyna «Aýyl» halyqtyq-demokratııalyq patrıottyq partııasynan usynylǵan Jıgýlı Daırabaev memlekettik tildi meńgerý deńgeıin anyqtaý úshin Ortalyq saılaý komıssııasynda emtıhan tapsyryp jatyr, dep habarlaıdy QazAqparat tilshisi.

Ortalyq saılaý komıssııasynda kezekten tys prezıdent saılaýyna úmitkerlerdiń memlekettik tildi bilý deńgeıin anyqtaý boıynsha lıngvıstıka komıssııasynyń kezekti otyrysy ótip jatyr. Bul joly komıssııa músheleri «Aýyl» partııasynan usynylǵan Jıgýlı Daırabaevtyń qazaq tilin meńgerý deńgeıin sarapqa salady.

Lıngvıstıkalyq emtıhan barlyq úsh kezeń boıynsha ótedi: taqyrypqa saı jazbasha tapsyrma oryndaý, mátin oqý jáne kandıdat tańdaǵan taqyryp boıynsha kópshilik aldynda keminde on bes mınýt sóz sóıleý.

Eske salaıyq, búgin Ortalyq saılaý komıssııasy «Amanat» kásipodaqtar dostastyǵynan usynylǵan Meıram Qajykenniń , halyqtyq koalıtsııadan usynylǵan Qasym-Jomart Toqaevtyń kandıdatýralaryn talaptarǵa saı dep sheshim qabyldaǵan bolatyn. Sondaı-aq Q.Toqaev lıngvıstıka komıssııasynda nelikten emtıhan tapsyrmaıtynyn túsindirdi.