Jıgýlı Daırabaev Memleket basshysyn saılaýdaǵy jeńisimen quttyqtady
«Saılaý naýqany óz máresine jetti, aldyn ala qorytyndysy shyqty, halyq óz tańdaýyn jasady. Eń aldymen, maǵan senim bildirip, daýys bergen saılaýshylaryma shyn júrekten alǵysymdy aıtamyn!» - dedi kandıdat.
Ol saıası naýqanda usynǵan baǵdarlamasy osy saılaýmen toqtap qalmaıtynyn atap ótti. Saılaýldy qujatynda kórsetilgen bastamalaryn budan keıin de jalǵastyra beretinine sendirdi.
«Halyqtyń jaǵdaıyn, ál-aýqatyn jaqsartý úshin búkil kúsh-jigerimdi, mańdaı terimdi arnaımyn.
Sodan soń, Qasym-Jomart Toqaevty jeńisimen quttyqtaımyn! El ıgiligi úshin eńbek etedi dep kámil senemin! Jańadan saılanǵan Memleket basshysyna el basqarý isinde tabys tileımin!» - dedi Daırabaev.
Jıgýlı Moldahalyquly saılaýaldy kampanııasynda eki basty maqsatqa qol jetkizgenin málimdedi.
«Birinshiden, aýyl jáne aýyl sharýashylyǵynyń qomaqty máselelerin qoǵam aldynda taǵy da kóterdik. Ekinshiden, «Aýyl» partııasynyń jumysyn jan-jaqty nasıhattap, partııanyń múmkindikteri men elektoraldyq kúsh-qýatyn halyqqa tanyta bildik.
Aýyl turǵyndary «Aýyl» partııasyna senedi. Biz munymen toqtap qalmaımyz, aýyl men agro salanyń bolashaǵy úshin jumysymyzdy jalǵastyra beremiz! Endi aldaǵy elektoraldyq naýqandarǵa daıyndalamyz!» - dedi Jıgýlı Daırabaev.
Eske salsaq, 20 qarashada ótken kezekten tys Prezıdent saılaýy kezinde Exit poll ádistemesi boıynsha júrgizilgen saýalnamalardyń alǵashqy qorytyndylary málim boldy.
