Jigitterdiń 70%-y bolashaq əıelderi musylmansha tərbıelengenin qalaıdy - saýalnama
ASTANA. QazAqparat - Almaty oblysy men Ońtústik Qazaqstan oblysynda júrgizilgen saýalnamaǵa qatysqan jigitterdiń 70%-y bolashaq jarym musylman tərbıesin kórgen qyz bolsa eken degendi aıtqan.
Bul týraly búgin qyz balalardyń quqyǵyn qorǵaý jəne durys tərbıe berý məseleleri talqylanǵan dóńgelek ústel barysynda QR Prezıdenti janyndaǵy Əıelder isteri jəne otbasylyq-demografııalyq saıasat jónindegi ulttyq komıssııanyń múshesi Əsııa Haırýllına məlim etti.
"Búgin talqylaıtyn taǵy bir məsele - qyz balalardyń erte turmys qurýy jəne qyz alyp qashý, ıaǵnı, məjbúrli neke məselesi. Almaty jəne Ońtústik Qazaqstan oblysynda arnaıy saýalnama júrgizdik,turǵyndardyń kóbi qyz alyp qashý dəstúr ekenin aıtty. Al, saýalnamaǵa qatysqan jas jigitterdiń 70%-y bolashaqta qazaqy salt-dəstúrdi biletin, musylman sharttarynda tərbıelengen boıjetkenge úılengisi keletinderin jetkizdi",-deıdi Ə.Haırýllına.
Aldy-artyn əli tanymaǵan qyz balalardy durys tərbıeleý tek ata-ananyń ǵana emes, tutastaı bir ulttyń mindeti ekeni anyq. Erte me, kesh pe, kez kelgen qyz əke-sheshesiniń qolynan ushyp, jar aldyndaǵy, ata-ene aldyndaǵy mindetin oryndaýǵa kirisedi. Ə.Haırýllına atap ótkendeı, bir úıdiń tútinin tútetip, bilimdi de deni saý urpaq jalǵastyrý úshin qyz balanyń aqyl toqtatqany abzal.
"Osy baǵytta ərıne nasıhatty kúsheıtý kerek. Nasıhat jumystaryna bilim berý, densaýlyq saqtaý, mədenıet jəne din salalarynyń mamandary qatysýy kerek. Osy rette aıta keteıin, bizdiń baǵdarlamalarǵa Qazaqstan musylmandary dinı basqarmasy atsalysqan. Mine, Dinı basqarma da sharıǵatta qyz balaǵa qandaı qurmet kórsetý kerek ekenin, qyzdar men əıelderge zorlyq kórsetýdiń jazasyn, jənnat ananyń aıaǵynyń astynda ekenin, qyz balalardyń aqyl toqtatqannan soń ǵana otbasyn qurý kerektigin, jas qyzdardy məjbúrlep turmysqa berý sharıǵatqa qaıshy əreket ekenin aıtty", - deıdi óz sózinde Ə.Haırýllına.
