«Jigitter» toby «Daryn» memlekettik syılyǵynyń laýreaty atandy (FOTO)
ASTANA. QazAqparat - Búgin Astanada QR Úkimetiniń «Daryn» memlekettik jastar syılyǵynyń laýreattary jarııalandy.
«Teatr jáne kıno» atalymdary boıynsha teatr jáne kıno ártisteri Ádil Ahmetov, Medǵat Ómirálıev marapattaldy. «Jýrnalıstıka» atalymynda syılyq telejúrgizýshi Rahat Jaqsybaıǵa, Qazaqstan ulttyq arnasynyń Qytaı Halyq Respýblıkasyndaǵy menshikti tilshisi Dáýren Omarovqa tapsyryldy. «Ádebıet» atalymy boıynsha QR Ulttyq akademııalyq kitaphanasy janynan qurylǵan «TÁJ» ádebı-ıntellektýaldy klýbynyń jetekshisi Erlan Júnisov laýreat atansa, «Estrada» atalymynda «Daryn» syılyǵyna «Jigitter» toby, ánshi-kompozıtor Eskendir Ibragım, Qazaq ulttyq óner ýnıversıtetiniń 1 kýrs stýdenti Dinmuhammed Qudaıbergen laıyq dept tanyldy.
Budan bólek, «Klassıkalyq mýzyka» atalymy boıynsha «Dallas Opera Orkestr» kontsertmeısteri Ordabek Dúısen, vıolonchelshi Ermek Qurmanaev marapattaldy.
«Halyq shyǵarmashylyǵy» atalymynda dırıjer Arman Júdebaev, dombyrashy Aqbota Erbolatqyzy úzdik dep ataldy.
Munymen qosa «Dızaın jáne beıneleý óneri» atalymy boıynsha syılyq dızaıner Darıǵa Taıshıkovaǵa, «Ǵylym» atalymynda respýblıkalyq jáne halyqaralyq baıqaýlardyń júldegeri Qaısar Tabynov pen PhD doktory Aınur Temirhanovaǵa tapsyryldy.
«Qoǵamdyq qyzmet» atalymynda Qazaq ınnovatsııalyq gýmanıtarlyq-zań ýnıversıtetiniń qyzmetkeri Dýman Ábiltaıulyna, osy salada jemisti qyzmet atqaryp júrgen Marııa Glýshkovskaıa marapattaldy.
«Sport» atalymy boıynsha bokstan QR Ulttyq qurama komandasynyń kapıtany Danııar Eleýsinov laýreat atandy.
Aıta keteıik, «Daryn» memlekettik jastar syılyǵyn 1996 jylǵy 7 tamyzda Qazaqstan Respýblıkasy Úkimeti bekitken jáne alǵashqy ret 1998 jyly berildi. Syılyq 35 jasqa deıingi el azamattaryna ǵylymı, shyǵarmashylyq jáne qoǵamdyq qyzmetteri úshin tapsyrylady. Syılyq talantty jastardy yntalandyrý jáne olardyń sińirgen eńbegin baǵalaý maqsatynda eki jylda bir ret beriledi. Syılyq 10 atalym boıynsha belgilendi.
