Jıdebaıdaǵy dúbirli doda: Astanalyq qusbegiler birneshe atalym boıynsha júldeger atandy
SEMEI. KAZINFORM — 27-29 qarasha aralyǵynda Abaı oblysynyń Abaı aýdanyna qarasty Jıdebaı qoryǵynda «Abaı salbýryny – 2025» respýblıkalyq qusbegiler týrnıri ótti. Saıys Abaı Qunanbaıulynyń 180 jyldyq mereıtoıyna oraı QR Qusbegilik federatsııasynyń qoldaýymen uıymdastyryldy. Bul týraly Astana ákimdigi málim etti.
Týrnır barysynda búrkit, ıtelgi jáne qarshyǵa baptaý boıynsha qusbegiler saıysymen qatar, qazaqy tazy júgirtý, ulttyq sport túrlerinen jarystar men basqa da etno baǵdarlamalar ótkizildi. Bıylǵy dúbirli dodaǵa elimizdiń 12 óńirinen 70-ke jýyq búrkit, 14 ıtelgi, 15 qarshyǵa jáne 20-dan astam tazy qatysty.
Ulttyq oıyn básekesinde elordanyń namysyn Aıan Dosymanov, Serikbek Kúntýǵan, Dıas Kúntýǵan jáne Erasyl Serikbekuly abyroımen qorǵady. Erasyl Serikbekuly búrkit saıysynda І oryn, Qarshyǵa saıysynda ІІ oryn ıelenip, elordalyq komandanyń mereıin ústem etti.
Jarystyń nátıjesin qorytyndylap, jeńimpazdardy saltanatty túrde marapattaý rásimine Abaı oblysynyń ákimi, QR Qusbegilik federatsııasynyń prezıdenti Berik Ýálı arnaıy qatysyp, ulttyq ónerdi dáripteýge úles qosqan qusbegilerge alǵysyn bildirdi.
— Jıdebaı óńirindegi etnoaýylda ótken týrnır ulttyq sportty keńinen nasıhattap, dástúrli qusbegilik ónerdiń mártebesin arttyrdy. Elorda sportshylarynyń bul jetistigi jas býynnyń babadan qalǵan asyl ónerdi laıyqty jalǵap kele jatqanyn kórsetedi, — delingen habarlamada.
Eske sala keteıik, buǵan deıin Ertis boıynda qala balalaryn qusbegilikke baýlyp júrgen pedagog turatynyn jazǵanbyz.