«Jıdebaı - Bórili» mýzeıi: Aqtóbelikter Abaı tutynǵan zattarmen tanysa alady
AQTÓBE. QazAqparat - Abaıdyń «Jıdebaı-Bórili» memlekettik tarıhı-mádenı jáne ádebı-memorıaldyq qoryq-mýzeıiniń «Abaı murasy – rýhanı qazyna» atty kóshpeli kórmesi Aqtóbege ákelindi. Endi bir aı boıy aqtóbelikter aqynnyń murasymen tanysa alady, dep habarlaıdy QazAqparat tilshisi.
Uly aqyn Abaıdyń 175 jyldyǵyna oraı Aqtóbe oblystyq mádenıet, arhıvter jáne qujattama basqarmasynyń qoldaýymen Abaıdyń «Jıdebaı-Bórili» memlekettik tarıhı-mádenı jáne ádebı-memorıaldyq qoryq-mýzeıiniń «Abaı murasy – rýhanı qazyna» atty kórmesi ashyldy.
«Abaıdyń ómiri men shyǵarmashyǵyna qatysty qundy derektermen tanysyp, mýzykalyq murasy, qoǵamdyq qyzmeti, Qunanbaı Óskenbaıuly týraly muraǵat derekterin oqyp, kórýge bolady. Kórmege 100-den astam jádiger ákelindi. Munda Abaı alaqanynyń taby qalǵan qundy dúnıeler bar. Olar: eri, kise belbeý, toǵyzqumalaq taqtasy. 1885 jyly Semeıdegi tarıhı-ólketaný mýzeıine Abaıdyń ózi tapsyrǵan asataıaq, sybyzǵy, HІH ǵasyrda paıdalanylǵan daýylpaz syndy mýzykalyq aspaptary da jetkizildi. Kórmede Abaı bilim alǵan Semeı qalasyndaǵy Ahmet Rıza meshit-medresesiniń oqýlyqtary bar. Bul HІH ǵasyrdaǵy Orta Azııa elderinde jaryq kórgen oqýlyqtar men tanymdyq kitaptar», - dedi mýzeıdiń aǵa ǵylymı qyzmetkeri Qýat Qıyqbaı.
Aıta keteıik, Abaıdyń ádebı-memorıaldyq mýzeıi M.Áýezovtiń usynysy boıynsha aqynnyń týǵanyna 95 jyl tolý qarsańynda Qazaq KSR-niń Halyq Komıssarlar keńesiniń qaýlysy negizinde quryldy. Qazaqstan tarıhyndaǵy tuńǵysh ádebı mýzeı. 1990 jyly Abaıdyń 145 jyldyq mereıtoıyna oraı Qazaq KSR Mınıstrler keńesiniń qaýlysymen «Jıdebaı-Bórili» memlekettik tarıhı-mádenı jáne ádebı-memorıaldyq qoryq-mýzeıi bolyp quryldy. Qoryq-mýzeıdiń negizgi qoryn 1885 jyly Abaıdyń ólketaný mýzeıine tapsyrǵan zattary quraıdy.
